ಮುಂಬೈ: ಆಸ್ಟ್ರೇಲಿಯಾ ವಿರುದ್ಧದ 2ನೇ ಪಂದ್ಯದಲ್ಲಿ ಕೆ ಎಲ್ ರಾಹುಲ್ ಬ್ಯಾಟಿಂಗ್ ಜೊತೆಗೆ ವಿಕೆಟ್ ಕೀಪಿಂಗ್ನಲ್ಲೂ ಮಿಂಚಿದ್ದರು. ಆದರೆ, ಇದೇ ಜವಾಬ್ದಾರಿಯನ್ನು ದೀರ್ಘಾವಧಿಗೆ ಮುಂದುವರಿಸುವುದು ಬೇಡ ಎಂದು ಭಾರತ ತಂಡದ ಮಾಜಿ ಕ್ರಿಕೆಟಿಗರು ಅಭಿಪ್ರಾಯ ಪಟ್ಟಿದ್ದಾರೆ.
ಭಾರತ ತಂಡದ ಪರ ಆಡಿರುವ ಆಕಾಶ್ ಚೊಪ್ರಾ ಹಾಗೂ ಮಾಜಿ ವಿಕೆಟ್ ಕೀಪರ್ ನಯನ್ ಮೊಂಗಿಯಾ ಕೆ ಎಲ್ ರಾಹುಲ್ ದೀರ್ಘಾವಧಿಯ ವಿಕೆಟ್ ಕೀಪರ್ ಆದರೆ ಅದು ಅವರ ಬ್ಯಾಟಿಂಗ್ ಮೇಲೆ ಪರಿಣಾಮ ಬೀರಲಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ರಾಹುಲ್ ಈ ಹಿಂದೆ ಅರೆಕಾಲಿಕ ವಿಕೆಟ್ ಕೀಪರ್ ಆಗಿದ್ದ ದ್ರಾವಿಡ್ಗಿಂತಲೂ ಉತ್ತಮ ವಿಕೆಟ್ ಕೀಪರ್. ಆದರೆ, ರಾಹುಲ್ ಕೀಪಿಂಗ್ ಹಾಗೂ ಬ್ಯಾಟಿಂಗ್ ಎರಡೂ ಜವಾಬ್ದಾರಿಗಳನ್ನು ನಿರ್ವಹಿಸಬಾರದು. ಅವರು 50 ಓವರ್ಗಳ ತನಕ ಕೀಪಿಂಗ್ ಮಾಡಿ ಮೇಲಿನ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವುದು ಆಸಾಧ್ಯ. ರಾಹುಲ್ ನನ್ನ ಪ್ರಕಾರ ಅತ್ಯುತ್ತಮ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್. ಆದರೆ, ಎರಡೂ ಜವಾಬ್ದಾರಿ ನಿರ್ವಹಿಸಿದರೆ ಅವರಿಗೆ ಕೆಲಸದ ಒತ್ತಡ ಹೆಚ್ಚಾಗುತ್ತದೆ ಎನ್ನುವುದೇ ನನ್ನ ಅನಿಸಿಕೆ. ಹಾಗಾಗಿ ರಾಹುಲ್ ತಂಡದ 2ನೇ ವಿಕೆಟ್ ಕೀಪರ್ ಆಗಿರುವುದೇ ಉತ್ತಮ ಎಂದು ಆಕಾಶ್ ಚೋಪ್ರಾ ತಿಳಿಸಿದ್ದಾರೆ.
ಮತ್ತೊಬ್ಬ ಮಾಜಿ ಕ್ರಿಕೆಟಿಗ ನಯನ್ ಮೊಂಗಿಯಾ ಕೂಡ ರಾಹುಲ್ ತಂಡದ ವಿಕೆಟ್ ಕೀಪರ್ಗೆ ನಂಬರ್ ಒನ್ ಆಯ್ಕೆಯಾಗಬಾರದು. ಅವರು 2ನೇ ವಿಕೆಟ್ ಕೀಪರ್ ಆಗಿ ಉತ್ತಮರು. ಅವರು ಟಿ20 ಕ್ರಿಕೆಟ್ನಲ್ಲಿ ವಿಕೆಟ್ ಕೀಪಿಂಗ್ ಮಾಡಬಹುದು. ಆದರೆ, ಏಕದಿನ ಕ್ರಿಕೆಟ್ನಲ್ಲಿ ಅಸಾಧ್ಯ. ಆದ್ದರಿಂದ ತಂಡದಲ್ಲಿ ಒಬ್ಬ ಖಾಯಂ ವಿಕೆಟ್ ಕೀಪರ್ ಇರಲೇಬೇಕು ಎಂದು ತಿಳಿಸಿದ್ದಾರೆ.
ರಿಷಭ್ ಪಂತ್ ಅನುಪಸ್ಥಿತಿಯಲ್ಲಿ ರಾಹುಲ್ ತಮ್ಮ ಜವಾಬ್ದಾರಿ ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ. ಆದರೆ, ಅವರೇ ಖಾಯಂ ವಿಕೆಟ್ ಕೀಪರ್ ಆದರೆ ಖಂಡಿತ ಅವರ ಬ್ಯಾಟಿಂಗ್ಗೆ ತೊಂದರೆಯಾಗುತ್ತದೆ. ರಾಹುಲ್ ತಂಡದ ವಿಕೆಟ್ ಕೀಪರ್ಗಿಂತ ಬ್ಯಾಟ್ಸ್ಮನ್ ಆಗಿ ಹೆಚ್ಚು ಅವಶ್ಯಕರಾಗಿದ್ದಾರೆ ಎಂದು ಎಂದು ಮೊಂಗಿಯಾ ಅಭಿಪ್ರಾಯಪಟ್ಟಿದ್ದಾರೆ.
ರಾಜ್ಕೋಟ್ನಲ್ಲಿ ನಡೆದಿದ್ದ ಆಸೀಸ್ ವಿರುದ್ಧದ 2ನೇ ಏಕದಿನ ಪಂದ್ಯದಲ್ಲಿ ರಾಹುಲ್ 80 ರನ್ಗಳಿಸಿ ತಂಡದ ಮೊತ್ತವನ್ನು ಹೆಚ್ಚಿಸಿದ್ದಲ್ಲದೆ. ವಿಕೆಟ್ ಕೀಪಿಂಗ್ನಲ್ಲಿ ಒಂದು ಸ್ಟಂಪ್ ಹಾಗೂ ಎರಡು ಕ್ಯಾಚ್ ಪಡೆದು ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು.
