ಸದ್ಯ ಸ್ಯಾಂಡಲ್‌ವುಡ್ನಲ್ಲಿ ಕರಾವಳಿ ಹುಡುಗರ "ಲುಂಗಿ"ಯ ಕಾರುಬಾರು ಜೋರಾಗಿದೆ. ಟ್ರೈಲರ್ನಿಂದಲೇ ಸಖತ್ ಸೌಂಡ್ ಮಾಡ್ತಿರುವ "ಲುಂಗಿ" ಚಿತ್ರ ಇದೀಗ ರಿಲೀಸ್ಗೆ ರೆಡಿಯಾಗ್ತಿದ್ದು, ಚಿತ್ರತಂಡ ಆಡಿಯೋ ಲಾಂಚ್ ಮಾಡಿದೆ.
ಮಲ್ಲೇಶ್ವರಂನ ಎಸ್ ಆರ್ ವಿ ಥಿಯೇಟರ್ನಲ್ಲಿ ನಡೆದ ಆಡಿಯೋ ಬಿಡುಗಡೆ ಕಾರ್ಯಕ್ರಮಕ್ಕೆ ನಿರ್ದೇಶಕ ಸಿಂಪಲ್ ಸುನಿ ಆಗಮಿಸಿ ಚಿತ್ರದ ಆಡಿಯೋ ಹಾಗೂ ಒಂದು ಲಿರಿಕಲ್ ವಿಡಿಯೋ ಸಾಂಗ್ ಲಾಂಚ್ ಮಾಡಿ ಚಿತ್ರತಂಡಕ್ಕೆ ವಿಶ್ ಮಾಡಿದ್ರು.
ಅಲ್ಲದೆ ನಾನು ಲುಂಗಿ ಚಿತ್ರದ ಅಫಿಶಿಯಲ್ ಪೇಜ್ ಶುರುವಾದಗಿನಿಂದಲೂ ಫಾಲೋ ಮಾಡ್ತಿದ್ದು. ಈ ಚಿತ್ರವನ್ನು ತುಂಬಾ ಡಿಫರೆಂಟ್ ಆಗಿ ಮಾಡಿದ್ದಾರೆ ಎಂದು ಚಿತ್ರತಂಡಕ್ಕೆ ಬೆನ್ನು ತಟ್ಟಿದ್ರು. ಇನ್ನು, ಈ ಚಿತ್ರವನ್ನು ಮುಖೇಶ್ ಹೆಗಡೆ ನಿರ್ಮಾಣ ಮಾಡಿದ್ದು, ಈ ಚಿತ್ರದ ಮೂಲಕ ತಮ್ಮ ಮಗ ಪ್ರಣವ್ ಹೆಗಡೆಯನ್ನು ಬೆಳ್ಳಿತೆರೆಗೆ ಪರಿಚಯಿಸಿದ್ದಾರೆ.
ಲುಂಗಿ ಚಿತ್ರವನ್ನು ಚಮಕ್ ಚಿತ್ರದಲ್ಲಿ ಸಿಂಪಲ್ ಸುನಿ ಜೊತೆ ಸಹಾಯಕ ನಿರ್ದೇಶಕನಾಗಿ ವರ್ಕ್ ಮಾಡಿದ್ದ ಅರ್ಜುನ್ ಲೂಯಿಸ್ ತನ್ನ ಸ್ನೇಹಿತ ಅಕ್ಷಿತ್ ಶೆಟ್ಟಿ ಜೊತೆ ಸೇರಿ ಆಕ್ಷನ್ ಕಟ್ ಹೇಳಿದ್ದಾರೆ. ಅಲ್ಲದೆ ಚಿತ್ರದ ಎಲ್ಲಾ ಹಾಡುಗಳನ್ನು ಅರ್ಜುನ್ ಲೂಯಿಸ್ ಬರೆದಿದ್ದಾರೆ. ಈ ಸಿನಿಮಾ ಪಕ್ಕಾ ಮಂಗಳೂರು ಶೈಲಿ ಚಿತ್ರವಾಗಿದ್ದು, ಪದವಿ ಮುಗಿಸಿದ ಮಧ್ಯಮ ವರ್ಗದ ಯುವಕನೊಬ್ಬ ಬ್ಯುಸಿನೆಸ್ ಮಾಡಲು ಹಣಕ್ಕೆ ಯಾವ ರೀತಿ ಪರದಾಡುತ್ತಾನೆ ಎಂಬುದನ್ನು ವಿಡಂಬನಾತ್ಮಕವಾಗಿ ಹೇಳಲು ನಿರ್ದೇಶಕರು ಪ್ರಯತ್ನಿಸಿದ್ದಾರೆ.
ಚಿತ್ರದಲ್ಲಿ ಪ್ರಣವ್ ಹೆಗಡೆ, ಅಹಲ್ಯ ಸುರೇಶ್ ಹಾಗೂ ರಾಧಿಕ ರಾವ್ ನಟಿಸಿದ್ದಾರೆ. ಈ ಸಿನಿಮಾದಲ್ಲಿ ನಾಲ್ಕು ಹಾಡುಗಳಿದ್ದು ಪ್ರಸಾದ್ ಶೆಟ್ಟಿ ಸಂಗೀತ ನೀಡಿದ್ದಾರೆ.
