ವಾಷಿಂಗ್ಟನ್: ಬಿಬಿಸಿಯು ಸರ್ಕಾರದಿಂದ ಹಣಕಾಸು ಅನುದಾನ ಪಡೆಯುವ ಮಾಧ್ಯಮ ಎಂದು ಟ್ವಿಟರ್ನಲ್ಲಿ ಬಿಬಿಸಿ ಹ್ಯಾಂಡಲ್ಗೆ ಲೇಬಲ್ ಮಾಡಿರುವ ಎಲೋನ್ ಮಸ್ಕ್ ಅವರ ಕ್ರಮ ವ್ಯಾಪಕ ವಿವಾದ ಸೃಷ್ಟಿಸಿದೆ. ಆದರೆ ಟ್ವಿಟರ್ನ ಈ ಕ್ರಮಕ್ಕೆ ಬಿಬಿಸಿ ಆಕ್ಷೇಪ ವ್ಯಕ್ತಪಡಿಸಿದೆ. ಬಿಬಿಸಿ ಸೇರಿದಂತೆ ಸರ್ಕಾರದಿಂದ ಹಣ ಪಡೆಯುವ ಇನ್ನಿತರ ಮಾಧ್ಯಮ ಸಂಸ್ಥೆಗಳಾದ ಪಿಬಿಎಸ್, ಎನ್ಪಿಆರ್ ಮತ್ತು ವಾಯ್ಸ್ ಆಫ್ ಅಮೆರಿಕಾ ಸಂಸ್ಥೆಗಳ ಟ್ವಿಟರ್ ಹ್ಯಾಂಡಲ್ಗಳ ಮೇಲೆ ಕೂಡ ಇದೇ ರೀತಿಯ ಲೇಬಲ್ ಮಾಡಲಾಗಿದೆ.
ಆದಾಗ್ಯೂ ಸರ್ಕಾರಿ ಪ್ರಾಯೋಜಿತ ಇನ್ನಿತರ ಸಂಸ್ಥೆಗಳಾದ ಕೆನಡಾದ ಸಿಬಿಸಿ ಅಥವಾ ಕತಾರ್ನ ಅಲ್ ಜಜೀರಾ ಸಂಸ್ಥೆಗಳನ್ನು ಈ ವರ್ಗೀಕರಣಕ್ಕೆ ಸೇರಿಸಲಾಗಿಲ್ಲ. @BBC ಹೆಸರಿನ ಖಾತೆ 2.2 ಮಿಲಿಯನ್ ಅನುಯಾಯಿಗಳನ್ನು ಹೊಂದಿದೆ. ಇದನ್ನು ಪ್ರಸ್ತುತ ಸರ್ಕಾರಿ ಅನುದಾನಿತ ಎಂದು ಬ್ರಾಂಡ್ ಮಾಡಲಾಗಿದೆ. BBC ನ್ಯೂಸ್ (ವರ್ಲ್ಡ್) ಮತ್ತು BBC ಬ್ರೇಕಿಂಗ್ ನ್ಯೂಸ್ ಸೇರಿದಂತೆ BBC ಯ ಇತರ ಖಾತೆಗಳಿಗೆ ಇದೇ ರಿತಿಯ ಲೇಬಲ್ ಅನ್ನು ನೀಡಲಾಗಿಲ್ಲ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.
ಸರ್ಕಾರದ ಅನುದಾನಿತ ಮಾಧ್ಯಮ ಎಂದು ಪರಿಗಣಿಸಲು ಕಾರಣವಾದ ಅಂಶಗಳೇನು ಎಂಬುದಕ್ಕೆ ಟ್ವಿಟರ್ ವ್ಯಾಖ್ಯಾನ ನೀಡಿಲ್ಲ. ಟ್ವಿಟರ್ನ ಕ್ರಮದ ಬಗ್ಗೆ ಬಿಬಿಸಿ ಪ್ರತಿಕ್ರಿಯೆ ನೀಡಿದ್ದು, ಈ ಸಮಸ್ಯೆಯನ್ನು ಸಾಧ್ಯವಾದಷ್ಟು ಬೇಗ ಪರಿಹರಿಸಲು ನಾವು ಟ್ವಿಟರ್‌ನೊಂದಿಗೆ ಮಾತುಕತೆ ನಡೆಸಿದ್ದೇವೆ. ಬಿಬಿಸಿ ಸ್ವತಂತ್ರವಾಗಿತ್ತು ಮತ್ತು ಯಾವಾಗಲೂ ಸ್ವತಂತ್ರವಾಗಿರುತ್ತದೆ. ನಾವು ಪರವಾನಗಿ ಶುಲ್ಕದ ಮೂಲಕ ಬ್ರಿಟಿಷ್ ಸಾರ್ವಜನಿಕರಿಂದ ಹಣವನ್ನು ಪಡೆಯುತ್ತೇವೆ ಎಂದು ಹೇಳಿದೆ. ಬಿಬಿಸಿಯು ಪ್ರಧಾನವಾಗಿ ಬ್ರಿಟನ್ನ ಕುಟುಂಬಗಳಿಂದ ಪರವಾನಗಿ ಶುಲ್ಕದ ಮೂಲಕ ಹಣ ಪಡೆಯುತ್ತದೆ. ಇದಕ್ಕಾಗಿ ಬಿಬಿಸಿ ಅಲ್ಲದ ಚಾನಲ್‌ಗಳು ಅಥವಾ ಲೈವ್ ಸೇವೆಗಳನ್ನು ಸಹ ವೀಕ್ಷಿಸುವುದು ಅಗತ್ಯವಾಗುತ್ತದೆ. ವಾಣಿಜ್ಯ ಕಾರ್ಯಾಚರಣೆಗಳ ಮೂಲಕ ಇದಕ್ಕೆ ಪೂರಕವಾದ ಆದಾಯ ಪಡೆದುಕೊಳ್ಳಲಾಗುತ್ತದೆ.
ಎನ್ಪಿಆರ್ ಮಾಧ್ಯಮ ಸಂಸ್ಥೆಯ ಲೇಬಲ್ ಅನ್ನು ಸರ್ಕಾರಿ ಸಂಯೋಜಿತ ಮಾಧ್ಯಮ ಎಂದು ಬದಲಾಯಿಸಿದ ನಂತರ ಎಲೋನ್ ಮಸ್ಕ್ ಹಾಗೂ ಅಮೆರಿಕದ ಎನ್ಪಿಆರ್ ನೆಟ್ವರ್ಕ್ ಒಡೆತನದಲ್ಲಿರುವ ಎನ್ಪಿಆರ್ ಮಧ್ಯೆ ವಿವಾದ ಏರ್ಪಟ್ಟಿತ್ತು. ಸರ್ಕಾರಿ ಸಂಯೋಜಿತ ಮಾಧ್ಯಮ ಎಂದು ಹೇಳುವುದರ ಹಿಂದೆ ಅಮೆರಿಕ ಸರ್ಕಾರವು ಎನ್ಪಿಆರ್ನ ಸಂಪಾದಕೀಯ ನಿಲುವುಗಳ ಮೇಲೆ ಪ್ರಭಾವ ಬೀರಬಹುದು ಎಂಬ ಅರ್ಥವಿತ್ತು ಹಾಗೂ ಇದನ್ನು ಕ್ರೆಮ್ಲಿನ್ನಿಂದ ಪ್ರಾಯೋಜಿತವಾದ ರಷ್ಯಾ ಟುಡೇ ಮಾಧ್ಯಮಕ್ಕೆ ಹೋಲಿಸಲಾಗಿತ್ತು. ಇದಾಗಿ ಕೆಲವೇ ದಿನಗಳಲ್ಲಿ ಬಿಬಿಸಿ ಜೊತೆಗೆ ಇದೇ ರೀತಿಯ ವಿವಾದ ಉಂಟಾಗಿದೆ.
ಲೇಬಲ್ ಹಾಕಿದ ನಂತರ ತಾವು ಆ ಟ್ವಿಟರ್ ಹ್ಯಾಂಡಲ್ನಿಂದ ಯಾವುದೇ ಟ್ವೀಟ್ ಮಾಡುವುದಿಲ್ಲ ಎಂದು ಎನ್ಪಿಆರ್ ಹೇಳಿತ್ತು. ಇದರ ನಂತರ ಲೇಬಲ್ ಅನ್ನು ಸರ್ಕಾರದ ಅನುದಾನಿತ ಮಾಧ್ಯಮ ಎಂದು ಬದಲಾಯಿಸಲಾಗಿತ್ತು. ಟ್ವಿಟರ್ನ ಲೇಬಲ್ಗೆ ಶ್ವೇತಭವನ ಕೂಡ ಆಕ್ಷೇಪ ವ್ಯಕ್ತಪಡಿಸಿತ್ತು. ಈ ಬಗ್ಗೆ ಮಾತನಾಡಿದ ಶ್ವೇತಭವನದ ಮಾಧ್ಯಮ ಕಾರ್ಯದರ್ಶಿ ಕರೀನ್ ಜೀನ್-ಪಿಯರ್, ಎನ್ಪಿಆರ್ನ ಪತ್ರಕರ್ತರ ಸ್ವಾತಂತ್ರ್ಯದ ಬಗ್ಗೆ ಯಾವುದೇ ಸಂದೇಹವಿಲ್ಲ ಎಂದು ಹೇಳಿದ್ದರು.
ಇದನ್ನೂ ಓದಿ : ಗುಜರಾತ್ ವಿಧಾನಸಭೆಯಲ್ಲಿ ಬಿಬಿಸಿ ವಿರುದ್ಧ ಕ್ರಮಕ್ಕೆ ಆಗ್ರಹಿಸಿ ಸರ್ವಾನುಮತದ ನಿರ್ಣಯ
