ನವದೆಹಲಿ: ಹೈದರಾಬಾದ್ ಮೂಲದ ಭಾರತ ಬಯೋಟೆಕ್ ಸಂಸ್ಥೆ ರೂಪಿಸಿರುವ ಕೊವ್ಯಾಕ್ಸಿನ್ ಲಸಿಕೆ ಕೊರೊನಾ ವೈರಸ್ನ ಹೊಸ ತಳಿಗಳ ವಿರುದ್ಧ ಬಲವಾದ ಪ್ರತಿರಕ್ಷಣಾ ಶಕ್ತಿಯನ್ನು ನೀಡುತ್ತದೆ ಎಂಬುದನ್ನು ವಿಜ್ಞಾನಿಗಳು ಕಂಡು ಹಿಡಿದಿದ್ದಾರೆ. ಲಸಿಕೆ ಪಡೆದ 6 ತಿಂಗಳವರೆಗೂ ಲಸಿಕೆ ದೇಹದಲ್ಲಿ ವೈರಸ್ ಹರಡುವುದನ್ನು ಪ್ರತಿಬಂಧಿಸುತ್ತದೆ ಎಂಬ ಮಹತ್ವದ ವಿಚಾರವನ್ನು ಪತ್ತೆ ಮಾಡಿದ್ದಾರೆ.
ರೂಪಾಂತರ ಪಡೆದ ವೈರಸ್ನ ಟಿ ಕೋಶಗಳ ವಿರುದ್ಧ ಲಸಿಕೆ ದೃಢವಾದ ರಕ್ಷಣೆ ನೀಡುತ್ತದೆ. ಇದು ವೈರಸ್ನ ವೇಗವಾಗಿ ಹರಡುವ ತೀವ್ರತೆ ಮತ್ತು ಒತ್ತಡವನ್ನು ಕಡಿಮೆ ಮಾಡುತ್ತದೆ. ವ್ಯಾಕ್ಸಿನೇಷನ್ ಆದ ಕನಿಷ್ಠ 6 ತಿಂಗಳು ಕಾಲ ಲಸಿಕೆ ದೃಢವಾದ ಕೆಲಸ ಮಾಡುತ್ತದೆ ಎಂದಿದ್ದಾರೆ.
97 ಜನರ ಮೇಲೆ ಪ್ರಯೋಗ: ಫರೀದಾಬಾದ್ನ ಟಿಎಚ್ಎಸ್ಟಿಐ, ದೆಹಲಿಯ ಏಮ್ಸ್, ಫರೀದಾಬಾದ್ನ ಇಎಸ್ಐಸಿ ಮೆಡಿಕಲ್ ಕಾಲೇಜ್, ನವದೆಹಲಿಯ ಎಲ್ಎನ್ಜೆಪಿ ಮೆಡಿಕಲ್ ಸೇರಿದಂತೆ ವಿವಿಧ ಸಂಸ್ಥೆಗಳ ಸಹಯೋಗದಲ್ಲಿ ನ್ಯಾಷನಲ್ ಇನ್ಸಿಟ್ಯೂಟ್ ಆಫ್ ಇಮ್ಯುನೊಲಾಜಿ (NII)ನಲ್ಲಿ ವಿಜ್ಞಾನಿ ನಿಮೇಶ್ ಗುಪ್ತಾ ಮತ್ತು ಅವರ ತಂಡ 2 ಡೋಸ್ ಕೊವ್ಯಾಕ್ಸಿನ್ ಲಸಿಕೆ ಪಡೆದ 97 ಜನರ ಮೇಲೆ ಈ ಪ್ರಯೋಗ ನಡೆಸಲಾಗಿದೆ.
ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯ ಕಾನೂನುಬದ್ಧ ಸಂಸ್ಥೆಯಾದ ವಿಜ್ಞಾನ ಮತ್ತು ಇಂಜಿನಿಯರಿಂಗ್ ಸಂಶೋಧನಾ ಮಂಡಳಿಯ ಬೆಂಬಲದ ಮೇರೆಗೆ ಈ ಅಧ್ಯಯನ ನಡೆಸಲಾಗಿದೆ. ಲಸಿಕೆಯು ವೈರಸ್ನ ಸ್ಪೈಕ್, ಆರ್ಬಿಡಿ ಮತ್ತು ನ್ಯೂಕ್ಲಿಯೊಪ್ರೋಟೀನ್‌ಗಳ ವಿರುದ್ಧ ಪ್ರತಿಕಾಯಗಳನ್ನು ಉತ್ಪಾದಿಸುತ್ತದೆ ಎಂದು ಕಂಡು ಹಿಡಿಯಲಾಗಿದೆ.
ಡೆಲ್ಟಾ,ಆಲ್ಫಾ, ಬೀಟಾ ವಿರುದ್ಧ ಕಡಿಮೆ: ಆದರೆ, ಭಾರತದಲ್ಲಿ ಕಂಡುಬಂದ ಹೊಸ ರೂಪಾಂತರಿಯಾದ ಡೆಲ್ಟಾ, ದಕ್ಷಿಣಾ ಆಫ್ರಿಕಾ ಬೀಟಾ, ಬ್ರಿಟನ್ನಲ್ಲಿನ ಆಲ್ಫಾ ವೈರಸ್ಗಳ ಮೇಲೆ ಈ ಲಸಿಕೆಯ ಪ್ರಭಾವ ಹೆಚ್ಚಿನ ಮಟ್ಟದಲ್ಲಿಲ್ಲ. ಈ ವೈರಸ್ಗಳ ವಿರುದ್ಧ ಪ್ರತಿಕಾಯಗಳನ್ನು ಸೃಷ್ಟಿಸುವ ಮತ್ತು ಅವುಗಳಿಂದ ರಕ್ಷಣೆ ನೀಡುವ ಪ್ರಮಾಣ ಕಡಿಮೆ ಎಂಬುದನ್ನು ವಿಜ್ಞಾನಿಗಳು ಕಂಡು ಕೊಂಡಿದ್ದಾರೆ.
ಕ್ಷೀಣಿಸುತ್ತಿರುವ ವೈರಸ್ನ ಶಕ್ತಿಯ ವಿರುದ್ಧ ಕೊವ್ಯಾಕ್ಸಿನ್ ಲಸಿಕೆಯು ಮೆಮೊರಿ ಬಿ ಕೋಶಗಳನ್ನು ಉತ್ಪಾದಿಸುವ ಹೆಚ್ಚಿನ ಸಾಮರ್ಥ್ಯವನ್ನು ಹೊಂದಿದೆ ಎಂದು ಅಧ್ಯಯನ ತಿಳಿಸಿದೆ. ವೈರಸ್ ವಿರುದ್ಧವಾಗಿ ಮಾನವನಲ್ಲಿ ಉತ್ಪತ್ತಿಯಾಗುವ ಪ್ರತಿರಕ್ಷಣಾ ಕಾಯಗಳು ಬಲವಾಗಿರುವುದನ್ನು ಪುರಾವೆಗಳ ಸಮೇತ ಅಧ್ಯಯನ ತಿಳಿಸಿದೆ.
ಓದಿ: ಯಾವ ವಯಸ್ಸಿನವರು ಎಷ್ಟು ಆಲ್ಕೊಹಾಲ್ ಸೇವಿಸಬಹುದು? ಸಂಶೋಧನಾ ವರದಿ ಇಲ್ಲಿದೆ..
