ನವದೆಹಲಿ: 100 ಮಿಲಿಯನ್ ಡೋಸ್ ಸಿಂಗಲ್ ಶಾಟ್ ಜಾನ್ಸನ್ ಮತ್ತು ಜಾನ್ಸನ್ ಕೊರೊನಾ ಲಸಿಕೆಯನ್ನು ಯೂರೋಪಿಯನ್ ಒಕ್ಕೂಟದಿಂದ ಭಾರತಕ್ಕೆ ತರಲು ಅಸೋಸಿಯೇಷನ್ ಆಫ್ ಹೆಲ್ತ್ಕೇರ್ ಪ್ರೊವೈಡರ್ಸ್ ಎನ್ಜಿಒ ನಿರ್ಧರಿಸಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಎನ್ಜಿಓ ಮಹಾನಿರ್ದೇಶಕ ಡಾ.ಗಿರ್ಧರ್ ಜ್ಞಾನಿ, ಎನ್ಜಿಒ ಮೂಲಕ ದೇಶದ ಬಹುಪಾಲು ಆಸ್ಪತ್ರೆಗಳ ಪ್ರತಿನಿಧಿಸಿದ್ದೇವೆ. ಅಲ್ಲದೇ ಭಾರತಕ್ಕೆ 100 ಮಿಲಿಯನ್ (10 ಕೋಟಿ) ಡೋಸ್ಗಳ ಅಗತ್ಯತೆ ಕುರಿತು ಪತ್ರದ ಮೂಲಕ ಯುರೋಪಿಯನ್ ಯೂನಿಯನ್ಗೆ ತಿಳಿಸಿದ್ದೇವೆ. ಈ ಪ್ರಕ್ರಿಯೆ ಇನ್ನು ಪ್ರಗತಿ ಹಂತದಲ್ಲಿದೆ ಎಂದಿದ್ದಾರೆ. ಅಲ್ಲದೇ ನೇರವಾಗಿ ಲಸಿಕೆ ತಯಾರಿಕಾ ಸಂಸ್ಥೆಯನ್ನೇ ಸಂಪರ್ಕಿಸಲಾಗಿದೆ. ಇದು ಸಿಂಗಲ್ ಡೋಸ್ ಲಸಿಕೆಯಾಗಿದ್ದು, ಭಾರತದಲ್ಲಿ ಬಳಕೆಯಾಗುತ್ತಿರುವ ಲಸಿಕೆಗಳೆಲ್ಲವೂ ಎರಡು ಡೋಸ್ಗಳಾಗಿವೆ ಎಂದಿದ್ದಾರೆ.
ಇದು ಕಡಿಮೆ ವೆಚ್ಚ ಮತ್ತು ಗ್ರಾಮೀಣ ಜನರಿಗೆ ವಿಶೇಷವಾಗಿ ಪ್ರಯೋಜನಕಾರಿಯಾಗಲಿದೆ ಎಂದು ನಿರೀಕ್ಷಿಸಲಾಗಿದೆ. ಜೆ&ಜೆ ಸಿಂಗಲ್ - ಶಾಟ್ ಲಸಿಕೆಯಾಗಿರುವುದು ಭಾರತದಂತಹ ದೇಶಕ್ಕೆ ಉಪಯುಕ್ತವಾಗಲಿದೆ. ಲಸಿಕೆ ಪಡೆಯಲು ಹಿಂದೇಟು ಹಾಕುವ ಜನರನ್ನು ಸುಲಭವಾಗಿ ಈ ಲಸಿಕೆ ಪಡೆಯಲು ಪ್ರೇರೇಪಿಸಬಹುದು. ಕೇವಲ ಒಂದು ಡೋಸ್ ಆಗಿರುವುದರಿಂದ ಜನ ಲಸಿಕೆ ಪಡೆಯುವ ಸಾಧ್ಯತೆ ಹೆಚ್ಚು ಎಂದಿದ್ದಾರೆ.
ಇಯು ಮೂಲಕ ಖರೀದಿಸುತ್ತಿರುವುದರಿಂದ ಡೋಸ್ಗೆ 450 ರೂನಿಂದ 550 ರೂಪಾಯಿ ವರೆಗೂ ದರ ನಿಗದಿಯಾಗಬಹುದು. ಈಗಾಗಲೇ ಸುಮಾರು 750 ಆಸ್ಪತ್ರೆಗಳಿಗೆ ಲಸಿಕೆಯ ಅಗತ್ಯತೆ ಇದೆ ಎಂಬ ಡೇಟಾ ನಮ್ಮ ಬಳಿ ಇದೆ ಎಂದಿದ್ದಾರೆ.
ಓದಿ: ಮಾಡರ್ನಾ ಲಸಿಕೆಗೆ DCGI ಅನುಮೋದನೆ.. ಭಾರತಕ್ಕೆ ಅಮೆರಿಕದ ವ್ಯಾಕ್ಸಿನ್ ಲಗ್ಗೆ!