ವಾಶಿಂಗ್ಟನ್: ಕಾಂಗ್ರೆಸ್ನ ಪೂರ್ವಾನುಮತಿ ಇಲ್ಲದೇ ಇರಾನ್ ವಿರುದ್ಧ ಮಿಲಿಟರಿ ಕ್ರಮ ಕೈಗೊಳ್ಳುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸಾಮರ್ಥ್ಯವನ್ನು ಸೀಮಿತಗೊಳಿಸುವ 'ಯುದ್ಧ ಅಧಿಕಾರ ನಿರ್ಣಯ'ವನ್ನು ಯುಎಸ್ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ ಗುರುವಾರ ಅಂಗೀಕರಿಸಿದೆ.
ಕಾಂಗ್ರೆಸ್ನ ಎಲಿಸ್ಸಾ ಸ್ಲಾಟ್ಕಿನ್ ಅವರು ಮಂಡಿಸಿದ ನಿರ್ಣಯವು 224 -194 ಮತಗಳ ಅಂತರದಲ್ಲಿ ಅಂಗೀಕಾರವಾಯಿತು.
ಸ್ಲಾಟ್ಕಿನ್ ಈ ಹಿಂದೆ ಸಿಐಎ ವಿಶ್ಲೇಷಕರಾಗಿ ಶಿಯಾ ಸೇನಾಪಡೆಗಳಲ್ಲಿ ಮತ್ತು ಅಂತಾರಾಷ್ಟ್ರೀಯ ಭದ್ರತಾ ವ್ಯವಹಾರಗಳ ರಕ್ಷಣಾ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸಿದ್ದರು.
ಕಳೆದ ವಾರ ಬಾಗ್ದಾದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಬಳಿ ಅಮೆರಿಕಾ ಸೇನೆ ಏರ್ಸ್ಟ್ರೈಕ್ ನಡೆಸಿ ಮಿಲಿಟರಿ ಜನರಲ್ ಕಾಸಿಮ್‌ ಸುಲೇಮಾನಿಯನ್ನು ಹೊಡೆದುರುಳಿಸಿತ್ತು. ಈ ವೈಮಾನಿಕ ದಾಳಿಗೆ ಪ್ರತೀಕಾರವಾಗಿ ಇರಾಕಿನಲ್ಲಿರುವ ಯುಎಸ್ ಸೇನಾ ನೆಲೆಯ ಮೆಲೆ ಇರಾನ್ ಕ್ಷಿಪಣಿ ದಾಳಿ ನಡೆಸಿತ್ತು. ಇದಾದ ಒಂದು ದಿನದ ಬಳಿಕ ಈ ನಿರ್ಣಯ ಕೈಗೊಳ್ಳಲಾಗಿದೆ.
ಸುಲೇಮಾನಿಯನ್ನು ಕೊಂದ ದಾಳಿಯನ್ನು ಪ್ರಚೋದನಕಾರಿ ಹಾಗೂ ಸರಿಯಾದ ನಿರ್ಣಯ ಅಲ್ಲ ಎಂದು ಪರಿಗಣಿಸಿ ಯುಎಸ್ ಹೌಸ್ ಸ್ಪೀಕರ್ ನ್ಯಾನ್ಸಿ ಪೆಲೋಸಿ ಟ್ವೀಟ್ ಮಾಡಿದ್ದಾರೆ.
ಕಾಂಗ್ರೆಸ್ ಸಂಪರ್ಕಿಸದೆ, ಇರಾನ್ ಮತ್ತು ಯುಎಸ್ ನಡುವಿನ ಬಿಕ್ಕಟ್ಟನ್ನು ಹೆಚ್ಚಿಸುವ ಈ ನಿರ್ಧಾರವನ್ನು ಕೈಗೊಳ್ಳಲಾಗಿದೆ ಎಂದು ಪೆಲೋಸಿ ಆರೋಪಿಸಿದ್ದಾರೆ.
ಅಧ್ಯಕ್ಷರ ಈ ನಿರ್ಧಾರ ಉಭಯ ದೇಶಗಳ ನಡುವಿನ ಉದ್ವಿಗ್ನತೆಯನ್ನು ಹೆಚ್ಚಿಸುವ ಅಪಾಯವನ್ನುಂಟುಮಾಡಿದೆ. ಈ ಕಾರ್ಯತಂತ್ರವನ್ನು ಕಾಂಗ್ರೆಸ್ನ ಕೆಲವು ಸದಸ್ಯರು ಕೂಡಾ ಗಂಭೀರವಾಗಿ ಪರಿಗಣಿಸಿದ್ದಾರೆಂದು ಸ್ಪೀಕರ್ ಹೇಳಿದ್ದಾರೆ.
