ಪ್ರಭಾಸ್, ಕೃತಿ ಸನೋನ್ ಮುಖ್ಯಭೂಮಿಕೆಯ ಆದಿಪುರುಷ್ ಸಿನಿಮಾದ ಬಾಕ್ಸ್ ಆಫೀಸ್‌ ಕಲೆಕ್ಷನ್ ವಿಚಾರದಲ್ಲಿ ಚೇತರಿಕೆಯ ಲಕ್ಷಣ ಕಾಣತ್ತಿಲ್ಲ. ಕಳಪೆ ವಿಮರ್ಶೆಗಳು ಮತ್ತು ಋಣಾತ್ಮಕ ಬಾಯಿಮಾತುಗಳು ಕಾಳ್ಗಿಚ್ಚಿನಂತೆ ಹಬ್ಬಿ ಚಿತ್ರದ ಸೋಲಿಗೆ ಕಾರಣವಾಗಿದೆ. ಗಲ್ಲಾಪೆಟ್ಟಿಗೆಯಲ್ಲಿ ಕುಸಿತದ ಪ್ರವೃತ್ತಿ ಮುಂದುವರಿದಿದೆ. ಸೋಮವಾರದಂದು, ದೇಶೀಯ ಮಾರುಕಟ್ಟೆಯಲ್ಲಿ ಅತಿ ಕಡಿಮೆ ಕಲೆಕ್ಷನ್ ಮಾಡಿದೆ. ಇದುವರೆಗಿನ ಅತಿ ಕಡಿಮೆ ಕಲೆಕ್ಷನ್ ಸಂಖ್ಯೆ ಇದಾಗಿದೆ.
ನೆಗೆಟಿವ್ ವಿಮರ್ಷೆ: ಚಿತ್ರದ ಟೀಸರ್ ಬಿಡುಗಡೆ ಆಗೋವರೆಗೂ 'ಆದಿಪುರುಷ್' ಹಿಂದಿ ಚಿತ್ರರಂಗಕ್ಕೆ ಗೇಮ್ ಚೇಂಜರ್ ಚಲನಚಿತ್ರ ಎಂದು ಗ್ರಹಿಸಲಾಗಿತ್ತು. ಆದ್ರೆ ಟೀಸರ್ ಕಳಪೆಯಾಗಿದೆ ಎಂಬ ಪ್ರತಿಕ್ರಿಯೆಯನ್ನು ಗಳಿಸಿತು. ಬಳಿಕ ಟ್ರೇಲರ್ ಕೂಡ ಟೀಕೆಗೊಳಗಾಯಿತು. ಪುರಾತನ ಸಂಸ್ಕೃತ ಮಹಾಕಾವ್ಯ 'ರಾಮಾಯಣ'ದ ರೂಪಾಂತರವಾದ ಚಲನಚಿತ್ರವು ಗ್ರಾಫಿಕ್ ವಿಚಾರವಾಗಿ ಸಿಕ್ಕಾಪಟ್ಟೆ ಟ್ರೋಲ್ ಆಯಿತು. ಶ್ರೀರಾಮನ ಯುಗವನ್ನು ತಪ್ಪಾಗಿ ಚಿತ್ರಿಸಿರುವುದಾಗಿ ಮತ್ತು ದೇವರ ಬಾಯಿಂದ ಆಡುಮಾತಿನ ಭಾಷೆಯಲ್ಲಿ ಮಾತನಾಡಿಸಿರುವುದಕ್ಕಾಗಿ ಪ್ರೇಕ್ಷಕರ ಟೀಕೆ ಎದುರಿಸಿತು. ಇದು ಸಿನಿಮಾ ಕಲೆಕ್ಷನ್ ಸಂಖ್ಯೆ ಮೇಲೆ ಪರಿಣಾಮ ಬೀರಿತು.
11 ದಿನಗಳಲ್ಲಿ ಮೊದಲ ಬಾರಿ ಅತಿ ಕಡಿಮೆ ಸಂಗ್ರಹ: ಮೊದಲ ವಾರಾಂತ್ಯದಲ್ಲಿ ಚಿತ್ರವು ಯಶಸ್ವಿ ಆರಂಭಿಕ ದಿನಗಳನ್ನು ಹೊಂದುವಲ್ಲಿ ಯಶಸ್ವಿಯಾಯಿತು. ಮೂರು ದಿನಗಳಲ್ಲಿ ಎಲ್ಲರೂ ಹುಬ್ಬೇರಿಸುವಂತಹ ಕಲೆಕ್ಷನ್ ಮಾಡಿತು. ಆದರೆ ನಾಲ್ಕನೇ ದಿನದ ಕಲೆಕ್ಷನ್ ಸಿನಿಮಾ ಸೋಲಿನ ಸೂಚನೆ ನೀಡಿತು. ಒಂದಂಕಿಯ ಕಲೆಕ್ಷನ್ 11ನೇ ದಿನವೂ ಮುಂದುವರೆಯಿತು.
1.75 ಕೋಟಿ ರೂ. ಸಂಪಾದನೆ: Sacnilk ಪ್ರಕಾರ, ಆದಿಪುರುಷ್ ಸಿನಿಮಾ 11ನೇ ದಿನ (ಸೋಮವಾರ) ದೇಶೀಯ ಮಾರುಕಟ್ಟೆಯಲ್ಲಿ ಎಲ್ಲ ಭಾಷೆಗಳನ್ನು ಒಳಗೊಂಡಂತೆ 1.75 ಕೋಟಿ ರೂ. ಸಂಪಾದಿಸಿದೆ. ಭಾರತದಲ್ಲಿ ಈವರೆಗೆ ಒಟ್ಟು 277.50 ಕೋಟಿ ರೂ. ಗಳಿಸಿದೆ.
ಟಿಕೆಟ್ ದರ ಇಳಿಸಿದರೂ ಪ್ರಯೋಜನವಿಲ್ಲ: 11ನೇ ದಿನದಂದು ಹಿಂದಿ ಮಾರುಕಟ್ಟೆಯಲ್ಲಿ ಶೇ. 8.06ರಷ್ಟು ಆಕ್ಯುಪೆನ್ಸಿಯನ್ನು (ಪ್ರೇಕ್ಷಕರ ಸಂಖ್ಯೆ) ಹೊಂದಿತ್ತು. ವರದಿಗಳ ಪ್ರಕಾರ, ಯಾವುದೇ ದೊಡ್ಡ ಸಿನಿಮಾಗಳು ಬಿಡುಗಡೆ ಆಗದಿದ್ದರೂ, ಆದಿಪುರುಷ್ ಕಳಪೆ ಪ್ರದರ್ಶನ ಕಾಣುತ್ತಿದೆ. ಆಕ್ಯುಪೆನ್ಸಿ ದರ ಇಳಿಮುಖವಾದ ಹಿನ್ನೆಲೆ ಪ್ರೇಕ್ಷಕರನ್ನು ಸಿನಿಮಾ ಹಾಲ್‌ಗಳಿಗೆ ಸೆಳೆಯುವ ಪ್ರಯತ್ನವಾಗಿ, ಚಿತ್ರ ನಿರ್ಮಾಪಕರು ಟಿಕೆಟ್ ದರವನ್ನು 112 ರೂ.ಗೆ ಇಳಿಸಿದರು. ಆದರೂ ಯಾವುದೇ ಪ್ರಯೋಜನ ಆಗುವಂತೆ ಕಾಣುತ್ತಿಲ್ಲ.
ಇದನ್ನೂ ಓದಿ: ಮತ್ತೊಂದು ನೈಜ ಘಟನಾಧಾರಿತ ಸಿನಿಮಾ ಮಾಡಲು ಮುಂದಾದ 'ದಿ ಕೇರಳ ಸ್ಟೋರಿ' ನಿರ್ದೇಶಕ ಸುದೀಪ್ತೋ ಸೇನ್
ಟಿ-ಸೀರೀಸ್‌ನಿಂದ 500 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣ ಆಗಿರುವ ಆದಿಪುರುಷ್ ಜೂನ್ 16 ರಂದು ಹಿಂದಿ, ತಮಿಳು, ತೆಲುಗು, ಕನ್ನಡ ಮತ್ತು ಮಲಯಾಳಂ ಭಾಷೆಗಳಲ್ಲಿ ವಿಶ್ವಾದ್ಯಂತ ವಿಡುಗಡೆ ಆಗಿದೆ. ಶ್ರೀರಾಮನ ಪಾತ್ರದಲ್ಲಿ ಸೌತ್ ನಟ ಪ್ರಭಾಸ್, ಸೀತೆ ಪಾತ್ರದಲ್ಲಿ ನಾರ್ತ್ ನಟಿ ಕೃತಿ ಸನೋನ್ ಅಭಿನಯಿಸಿದ್ದಾರೆ. ಉಳಿದ ಪ್ರಮುಖ ಪಾತ್ರಗಳಾದ ಲಕ್ಷ್ಮಣನಾಗಿ ನಟ ಸನ್ನಿ ಸಿಂಗ್, ಹನುಮಂತನಾಗಿ ನಟ ದೇವದತ್ತ, ಲಂಕೇಶ್ ಆಗಿ ಸೈಫ್ ಅಲಿ ಖಾನ್ ನಟಿಸಿರುವ ಈ ಚಿತ್ರವನ್ನು ಓಂ ರಾವುತ್ ನಿರ್ದೇಶಿಸಿದ್ದಾರೆ.
ಇದನ್ನೂ ಓದಿ: Sudeep nephew Sanchith: ಸ್ಯಾಂಡಲ್ವುಡ್ಗೆ 'ಜೂನಿಯರ್ ಕಿಚ್ಚ' ಎಂಟ್ರಿ; ಸಂಚಿತ್ ಚೊಚ್ಚಲ ಸಿನಿಮಾಗೆ ಸ್ಟಾರ್ ನಟರ ಬೆಂಬಲ
