ಬೆಂಗಳೂರು: ಗ್ರಾಹಕನ ಸೋಗಿನಲ್ಲಿ ಆಭರಣ ಮಳಿಗೆಗೆ ಬಂದ ಕಳ್ಳನೊಬ್ಬ ಚೈನ್ ಖರೀದಿಸುವ ನೆಪದಲ್ಲಿ ಅದನ್ನು ಕತ್ತಿಗೆ ಹಾಕಿಕೊಂಡು ಕ್ಷಣಮಾತ್ರದಲ್ಲಿ ಪರಾರಿಯಾದ ಘಟನೆ ಇಲ್ಲಿನ ಎಸ್.ಆರ್. ನಗರ ಪೊಲೀಸ್ ಠಾಣಾ ವ್ಯಾಪ್ತಿಯ ಅನಿತಾ ಜುವೆಲರ್ಸ್ನಲ್ಲಿ ನಡೆದಿದೆ. ಘಟನೆಯ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.
ಚಿನ್ನದ ಚೈನ್ ಕದ್ದು ಕಳ್ಳ ಎಸ್ಕೇಪ್: ಎಂಗೇಜ್ಮೆಂಟ್ ಅಗೋದಿದೆ ಒಳ್ಳೆಯ ಚಿನ್ನದ ಚೈನ್ ತೋರಿಸಿ ಎಂದು ಆಭರಣದ ಅಂಗಡಿಗೆ ಬಂದ ಕಳ್ಳ ಹಲವು ಡಿಸೈನ್ ನೋಡಿ ದೊಡ್ಡ ಚೈನ್ ಯಾವುದಿದೆ ಕೊಡಿ ಎಂದು ಕೇಳಿದ್ದಾನೆ. ಈ ವೇಳೆ ಸಿಬ್ಬಂದಿ ಒಳ್ಳೆಯ ಕಸ್ಟಮರ್ ಎಂದು ನಂಬಿ 22.5 ಗ್ರಾಮ್ ತೂಕದ ಚಿನ್ನದ ಸರ ತೋರಿಸಿದ್ದರು. ಈ ವೇಳೆ ಚೆಕ್ ಮಾಡಿಕೊಳ್ಳುವ ರೀತಿಯಲ್ಲಿ ನಟಿಸಿ ಕೊರಳಿಗೆ ಚೈನ್ ಹಾಕೊಂಡು ಅಲ್ಲಿಂದ ಆರೋಪಿ ಪರಾರಿ ಆಗಿದ್ದಾನೆ.
ಖತರ್ನಾಕ್ ಕಳ್ಳನ ಕೈಚಳಕ ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿದ್ದು, ಈ ಸಂಬಂಧ ಎಸ್.ಆರ್.ನಗರ ಠಾಣೆಯಲ್ಲಿ ದೂರು ದಾಖಲಾಗಿದೆ. ಸಿಸಿಟಿವಿ ದೃಶ್ಯಾವಳಿ ಆಧರಿಸಿ ಆರೋಪಿ ಪತ್ತೆಗೆ ಪೊಲೀಸರು ಬಲೆ ಬೀಸಿದ್ದಾರೆ.