ಬೆಂಗಳೂರು : ಫುಡ್ ಡೆಲಿವರಿ ಪ್ಲಾಟ್ಫಾರ್ಮ್ ಸ್ವಿಗ್ಗಿ ಈವರೆಗೆ ವಿಧಿಸುತ್ತಿದ್ದ ಪ್ಲಾಟ್ಫಾರ್ಮ್ ಫೀಯನ್ನು 2 ರೂಪಾಯಿಗಳಿಂದ 3 ರೂಪಾಯಿಗೆ ಹೆಚ್ಚಿಸಿದೆ. ಅಕ್ಟೋಬರ್ 4 ರಿಂದ ಈ ಹೆಚ್ಚಳ ಜಾರಿಗೆ ಬಂದಿದೆ. ಆರಂಭದಲ್ಲಿ, ಹೈದರಾಬಾದ್ ಮತ್ತು ಬೆಂಗಳೂರಿನಲ್ಲಿ ಶುಲ್ಕವನ್ನು ಹೆಚ್ಚಿಸಲಾಗಿತ್ತು. ನಂತರ ದೇಶದ ಇತರ ನಗರಗಳಲ್ಲಿಯೂ ಫೀಯನ್ನು ಹೆಚ್ಚಿಸಲಾಯಿತು.
ಪ್ರಸ್ತುತ ಸ್ವಿಗ್ಗಿ 5 ರೂ.ಗಳ ಪ್ಲಾಟ್ಫಾರ್ಮ್ ಫೀ ವಿಧಿಸಿದ ನಂತರ 2 ರೂ.ಗಳ ರಿಯಾಯಿತಿ ನೀಡುತ್ತದೆ. ಅಂದರೆ ಪ್ಲಾಟ್ಫಾರ್ಮ್ ಫೀ ಮತ್ತೆ ಯಾವಾಗ ಬೇಕಾದರೂ ಹೆಚ್ಚಾಗಬಹುದು ಎಂಬುದನ್ನು ಇದು ಸೂಚಿಸುತ್ತದೆ. ಆರ್ಡರ್ ಮೌಲ್ಯ ಎಷ್ಟೇ ಇದ್ದರೂ ಏಪ್ರಿಲ್ನಿಂದ ಸ್ವಿಗ್ಗಿ ತನ್ನ ಗ್ರಾಹಕರಿಗೆ ಪ್ಲಾಟ್ಫಾರ್ಮ್ ಫೀ ವಿಧಿಸುತ್ತಿದೆ.
ಡೆಲಿವರಿ ಶುಲ್ಕದೊಂದಿಗೆ ಸೇರಿಸಿ ಪ್ಲಾಟ್ ಫಾರ್ಮ್ ಫೀ ವಿಧಿಸಲಾಗುತ್ತದೆ. ಆದರೆ ಸ್ವಿಗ್ಗಿಯ ಲಾಯಲ್ಟಿ ಪ್ರೋಗ್ರಾಂ ಸ್ವಿಗ್ಗಿ ಒನ್ಗೆ ಚಂದಾದಾರರಾಗಿರುವ ಗ್ರಾಹಕರಿಗೆ ಇದನ್ನು ಮನ್ನಾ ಮಾಡಲಾಗುತ್ತದೆ. ಸ್ವಿಗ್ಗಿ ಒನ್ ಕಾರ್ಯಕ್ರಮದ ಅಡಿಯಲ್ಲಿ, ಗ್ರಾಹಕರು ನಿರ್ದಿಷ್ಟ ಮುಂಗಡ ಪಾವತಿ ಮಾಡಿದ ನಂತರ ಆಹಾರ ಮತ್ತು ದಿನಸಿ ವಸ್ತುಗಳ ಉಚಿತ ವಿತರಣೆಯ ಚಂದಾದಾರಿಕೆಯನ್ನು ಪಡೆಯಬಹುದು.
ಕಂಪನಿಗಳು ತಮ್ಮ ಒಟ್ಟಾರೆ ಆದಾಯವನ್ನು ಸುಧಾರಿಸಲು ಪ್ಲಾಟ್ಫಾರ್ಮ್ ಶುಲ್ಕಗಳನ್ನು ಹೆಚ್ಚಿಸುತ್ತವೆ. ಉಬರ್, ಬಿಗ್ ಬಾಸ್ಕೆಸ್ನ ಬಿಬಿ ನೌ ಮತ್ತು ಜೆಪ್ಟೊ ಕೂಡ ಯುನಿಟ್ ಆದಾಯವನ್ನು ಹೆಚ್ಚಿಸಲು ಪ್ರತಿ-ಆರ್ಡರ್ ಶುಲ್ಕವನ್ನು ವಿಧಿಸುತ್ತಿವೆ. ಜೂನ್ನಲ್ಲಿ ಬಂದ ವರದಿಗಳ ಪ್ರಕಾರ ಸ್ವಿಗ್ಗಿಯ ನಷ್ಟವು ವರ್ಷದಿಂದ ವರ್ಷಕ್ಕೆ ಶೇಕಡಾ 80 ರಷ್ಟು ಏರಿಕೆಯಾಗಿ 2022 ರಲ್ಲಿ ಸುಮಾರು 540 ಮಿಲಿಯನ್ ಡಾಲರ್ಗೆ ತಲುಪಿದೆ. ಆಹಾರ ವಿತರಣೆಗಾಗಿ ಸ್ವಿಗ್ಗಿಯ ಒಟ್ಟು ಸರಕು ಮೌಲ್ಯವು ವರ್ಷದಿಂದ ವರ್ಷಕ್ಕೆ ಶೇಕಡಾ 26 ರಷ್ಟು ಹೆಚ್ಚಾಗಿದೆ ಎಂದು ತಂತ್ರಜ್ಞಾನ ಹೂಡಿಕೆದಾರ ನಾಸ್ಪರ್ಸ್ ಈ ಹಿಂದೆ ಹೇಳಿತ್ತು.
ಮಾರ್ಚ್ 2023 ರ ವೇಳೆಗೆ ಸ್ವಿಗ್ಗಿಯ ಆಹಾರ ವಿತರಣಾ ವ್ಯವಹಾರವು ಲಾಭದಾಯಕವಾಗಿದೆ ಎಂದು ಸ್ವಿಗ್ಗಿಯ ಮುಖ್ಯ ಕಾರ್ಯನಿರ್ವಾಹಕ ಶ್ರೀಹರ್ಷ ಮಜೆಟಿ ಮೇ ತಿಂಗಳಲ್ಲಿ ಹೇಳಿದ್ದರು. ಕಂಪನಿಯು ತನ್ನ ದಿನಸಿ ವಿತರಣಾ ವ್ಯವಹಾರವಾದ ಇನ್ಸ್ಟಾ ಮಾರ್ಟ್ ನಲ್ಲಿ ಹೆಚ್ಚುವರಿ ಹೂಡಿಕೆಗಳನ್ನು ಮಾಡಿದೆ ಮತ್ತು ಆ ವಿಭಾಗವು ಲಾಭ ಗಳಿಸಲಾರಂಭಿಸಿದ ನಂತರ ಹೂಡಿಕೆಗಳನ್ನು ಕಡಿಮೆ ಮಾಡಲಾಗುವುದು ಎಂದು ಮಜೆಟಿ ಹೇಳಿದ್ದರು.
ಇದನ್ನೂ ಓದಿ : ಉದ್ಯೋಗಕ್ಕಾಗಿ ಲಂಚ: 16 ನೌಕರರನ್ನು ವಜಾಗೊಳಿಸಿದ ಟಿಸಿಎಸ್
