ನವದೆಹಲಿ: ಅತ್ಯಂತ ಜನಪ್ರಿಯ ಮೆಸೇಜಿಂಗ್ ಆ್ಯಪ್ ವಾಟ್ಸ್ಆ್ಯಪ್ ಪ್ರಮುಖ ಫೀಚರ್ವೊಂದನ್ನ ಸದ್ಯದಲ್ಲೇ ತನ್ನೆಲ್ಲಾ ಬಳಕೆದಾರರಿಗೆ ಪರಿಚಯಿಸಲಿದೆ.
ವಾಟ್ಸ್ಆ್ಯಪ್ ಸದ್ಯ ಕಣ್ಮರೆಯಾಗುವ ಸಂದೇಶಗಳು(Disappearing Messages)ಎನ್ನುವ ಹೊಸ ಫೀಚರ್ ಅಳವಡಿಸಲು ಮುಂದಾಗಿದೆ. ಈ ಫೀಚರ್ ಸಂದೇಶ ರವಾನಿಸುವವರಿಗೆ ಹೆಚ್ಚಿನ ಭದ್ರತೆ ನೀಡಲಿದೆ.
ಏನಿದು ಕಣ್ಮರೆಯಾಗುವ ಸಂದೇಶಗಳು..?
ಮೆಸೇಜ್ ಕಳುಹಿಸುವ ವ್ಯಕ್ತಿ ಆ ಮೆಸೇಜ್ ಎಷ್ಟು ಹೊತ್ತು ಕಾಣಿಸಬೇಕು ಎನ್ನುವುದನ್ನು ಮೊದಲೇ ನಿರ್ಧರಿಸಬಹುದು. ಜೊತೆಗೆ ಇಂತಹ ಮೆಸೇಜ್ಗಳ ಸ್ಕ್ರೀನ್ಶಾಟ್ ತೆಗೆಯಲು ಸಾಧ್ಯವಿಲ್ಲ. ಹೀಗಾಗಿ ಇದು ಮೆಸೇಜ್ ರವಾನಿಸುವವನಿಗೆ ಹೆಚ್ಚಿನ ಸುರಕ್ಷತೆಯನ್ನು ನೀಡಲಿದೆ ಎನ್ನುವುದು ಸಂಸ್ಥೆಯ ಹೇಳಿಕೆ.
ಕನಿಷ್ಠ 5 ಸೆಕೆಂಡ್ನಿಂದ ಒಂದು ಗಂಟೆಯ ಅವಧಿಯವರೆಗೂ ಕಣ್ಮರೆಯಾಗುವ ಸಂದೇಶಗಳು ಕಾಣಿಸಿಕೊಳ್ಳಲಿವೆ. ಪ್ರಸ್ತುತ ಗ್ರೂಪ್ ಮೆಸೇಜ್ಗಳಿಗೆ ಈ ಫೀಚರ್ ಲಭ್ಯವಾಗುವಂತೆ ಮಾಡಲಿದ್ದು, ನಂತರದಲ್ಲಿ ವೈಯಕ್ತಿಕ ಸಂದೇಶಗಳಿಗೂ ಇವು ದೊರೆಯಲಿವೆ. ವಾಟ್ಸ್ಆ್ಯಪ್ ಬೇಟಾ ಆವೃತ್ತಿಯ 2.19.275 ವರ್ಷನ್ನಲ್ಲಿ ಈ ಫೀಚರ್ನ ಪ್ರಯೋಗ ಮಾಡಲಾಗುತ್ತಿದೆ ಎಂದು ತಿಳಿದು ಬಂದಿದೆ. ಹೊಸ ಫೀಚರ್ ಇನ್ನೂ ಅಧಿಕೃತವಾಗಿ ಬಳಕೆದಾರರಿಗೆ ಲಭ್ಯವಾಗಿಲ್ಲ.
