ಭಾರತೀಯ ವಾಯುಸೇನೆ ಸೇರಿದ ಏರ್​ಬಸ್​ ನಿರ್ಮಿಸಿದ ಸಿ-295 ಸಾರಿಗೆ ವಿಮಾನ; ರಾಜನಾಥ್​ ಸಿಂಗ್​ ಹಸಿರುನಿಶಾನೆ

ಗಾಜಿಯಾಬಾದ್ (ಉತ್ತರಪ್ರದೇಶ) : ಜಾಗತಿಕ ವಿಮಾನ ತಯಾರಕ ಸಂಸ್ಥೆಯಾದ ಏರ್‌ಬಸ್‌ನಿಂದ ನಿರ್ಮಿಸಲಾಗಿರುವ C-295 ಹೆಸರಿನ ಮೊದಲ ಸಾರಿಗೆ ವಿಮಾನವನ್ನು ವಾಯುಪಡೆಗೆ ಇಂದು (ಸೋಮವಾರ) ಸೇರ್ಪಡೆ ಮಾಡಲಾಯಿತು. ರಕ್ಷಣಾ ಸಚಿವ ರಾಜನಾಥ್​ ಸಿಂಗ್​ ಸಮ್ಮುಖದಲ್ಲಿ ದೈತ್ಯ ಸಾರಿಗೆ ವಿಮಾನವನ್ನು ಸೇನೆಗೆ ಅಧಿಕೃತವಾಗಿ ಹಸ್ತಾಂತರಿಸಿದರು. ಇಲ್ಲಿನ ಹಿಂದಾನ್ ಏರ್ ಫೋರ್ಸ್ ಸ್ಟೇಷನ್​ನಲ್ಲಿ ನಡೆದ ಸಮಾರಂಭದಲ್ಲಿ ದೈತ್ಯ ಸಾರಿಗೆ ವಿಮಾನವನ್ನು ವಾಯಸೇನೆಗೆ ಸೇರಿಸಿ ಅದರ ಶಕ್ತಿಯನ್ನು ಬಲಪಡಿಸಲಾಯಿತು.

ವಾಯುಸೇನೆಯ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ವಿ ಆರ್ ಚೌಧರಿ, ಐಎಎಫ್ ಮತ್ತು ಏರ್‌ಬಸ್‌ನ ಹಿರಿಯ ಅಧಿಕಾರಿಗಳು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಮೊದಲ C-295 ವಿಮಾನವನ್ನು ವಾಯುಸೇನೆಯ 11ನೇ ಸ್ಕ್ವಾಡ್ರನ್ ತಂಡಕ್ಕೆ ನೀಡಲಾಯಿತು. ಇದು ಭಾರತೀಯ ವಾಯುಪಡೆಯ ಅತ್ಯಂತ ಹಳೆಯ ಸ್ಕ್ವಾಡ್ರನ್‌ಗಳಲ್ಲಿ ಒಂದಾಗಿದೆ. ಇದು ಪ್ರಸ್ತುತ ವಡೋದರಾ ಏರ್​ಫೋರ್ಸ್ ಸ್ಟೇಷನ್‌ನಲ್ಲಿದೆ.

ಅದ್ಧೂರಿಯಾಗಿ ಆಯೋಜಿಸಿದ್ದ ಸೇರ್ಪಡೆ ಕಾರ್ಯಕ್ರಮದಲ್ಲಿ 11ನೇ ಸ್ಕ್ವಾಡ್ರನ್​ ಬ್ಯಾಚ್​ಗೆ ನೀಡಲಾದ C-295 ವಿಮಾನದ ಚಿತ್ರವನ್ನು ಪರದೆಯ ಮೇಲೆ ಸ್ಲೈಡ್​ ಮಾಡಿ ಅನಾವರಣ ಮಾಡಲಾಯಿತು. ಒಂದು ಕೊಂಬಿನ ಘೇಂಡಾಮೃಗವು ಸ್ಕ್ವಾಡ್ರನ್​ನ ಲಾಂಛನವಾಗಿದೆ.

56 ವಿಮಾನ ತಯಾರಿಕೆಗೆ ಒಪ್ಪಂದ: ವಾಯುಸೇನೆಯ ಬಳಿ ಸದ್ಯ ಹಳೆಯ ಅವ್ರೋ-748 ಫ್ಲೀಟ್ ವಿಮಾನವಿದೆ. ಇದು ಈಗಿನ ಸಾಮರ್ಥ್ಯಕ್ಕೆ ತಕ್ಕಷ್ಟು ಸಮರ್ಥವಾಗಿಲ್ಲದ್ದರಿಂದ ಜೆಟ್‌ ಮಾದರಿಯ ಸಾರಿಗೆ ವಿಮಾನ ತಯಾರಿಕೆಗಾಗಿ ಏರ್‌ಬಸ್ ಡಿಫೆನ್ಸ್ ಮತ್ತು ಸ್ಪೇಸ್‌ನೊಂದಿಗೆ ಕೇಂದ್ರ ಸರ್ಕಾರ 21,935 ಕೋಟಿ ರೂಪಾಯಿ ಒಪ್ಪಂದವನ್ನು ಎರಡು ವರ್ಷಗಳ (2021) ಹಿಂದೆ ಮಾಡಿಕೊಂಡಿದೆ. ಅದರಂತೆ ಮೊದಲ ಸಿ-295 ವಿಮಾನವನ್ನು ಸೆಪ್ಟೆಂಬರ್ 13 ರಂದು ದಕ್ಷಿಣ ಸ್ಪ್ಯಾನಿಷ್ ನಗರದ ಸೆವಿಲ್ಲೆಯಲ್ಲಿ ಸೇನೆಗೆ ಹಸ್ತಾಂತರಿಸಲಾಗಿತ್ತು.

ಒಪ್ಪಂದಕ್ಕೆ ಸಹಿ ಹಾಕಿದ 4 ವರ್ಷದೊಳಗೆ 16 ವಿಮಾನಗಳನ್ನು ಸ್ಪೇನ್‌ನಿಂದ ತಯಾರಿಸಬೇಕಿದೆ. ಇದಾದ ಬಳಿಕ 10 ವರ್ಷಗಳಲ್ಲಿ ಉಳಿದ 40 ವಿಮಾನಗಳನ್ನು ಭಾರತದಲ್ಲಿ ತಯಾರಿಸಲಾಗುತ್ತದೆ. ವಿದೇಶಿ ಖಾಸಗಿ ಕಂಪನಿಯೊಂದು ಭಾರತದಲ್ಲಿ ಮಿಲಿಟರಿ ವಿಮಾನವನ್ನು ತಯಾರಿಸುತ್ತಿರುವ ಮೊದಲ ಯೋಜನೆ ಇದಾಗಿದೆ.

ಎಲ್ಲಾ 56 ವಿಮಾನಗಳನ್ನು ಸ್ಥಳೀಯ ಎಲೆಕ್ಟ್ರಾನಿಕ್ ವಾರ್‌ಫೇರ್ ಸೂಟ್‌ನೊಂದಿಗೆ ಸ್ಥಾಪಿಸಲಾಗುವುದು. ಈ ಯೋಜನೆಯು ಭಾರತದಲ್ಲಿ ಏರೋಸ್ಪೇಸ್ ವ್ಯವಸ್ಥೆಗೆ ಉತ್ತೇಜನ ನೀಡಲಿದೆ. ಈ ಯೋಜನೆಯಲ್ಲಿ ದೇಶದ ಹಲವಾರು MSMEಗಳು ವಿಮಾನದ ಬಿಡಿಭಾಗಗಳ ತಯಾರಿಕೆಯಲ್ಲಿ ತೊಡಗಿಸಿಕೊಳ್ಳುತ್ತವೆ ಎಂದು ರಕ್ಷಣಾ ಸಚಿವಾಲಯ ತಿಳಿಸಿದೆ.

ವಡೋದರಾದಲ್ಲಿ ವಿಮಾನ ತಯಾರಿಕಾ ಘಟಕ: ಸಿ-295 ಸರಣಿಯ ಸಾರಿಗೆ ವಿಮಾನಗಳನ್ನು ಭಾರತದಲ್ಲಿ ತಯಾರಿಸಲು ಗುಜರಾತ್​ನ ವಡೋದರಾದಲ್ಲಿ ಘಟಕ ಆರಂಭಿಸಲಾಗಿದೆ. ನವೆಂಬರ್ 2024 ರ ವೇಳೆಗೆ ಕಾರ್ಯಾರಂಭ ಮಾಡುವ ನಿರೀಕ್ಷೆಯಿದೆ. ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಘಟಕ ಆರಂಭಕ್ಕೆ ಶಂಕುಸ್ಥಾಪನೆ ನೆರವೇರಿಸಿದ್ದರು. (ಪಿಟಿಐ)

ಇದನ್ನೂ ಓದಿ: ವಾಯುಸೇನೆಗೆ C-295 ಬಲ..ಮೊದಲ ಸಾರಿಗೆ ವಿಮಾನ ಭಾರತಕ್ಕೆ ಹಸ್ತಾಂತರ