ಉತ್ತರ 24 ಪರಗಣ(ಪಶ್ಚಿಮ ಬಂಗಾಳ): 119 ವರ್ಷದ ವೃದ್ಧರೊಬ್ಬರು ಮೃತಪಟ್ಟಿದ್ದು, ಕುಟುಂಬಸ್ಥರು ಮೃತನ ಅಂತಿಮ ಯಾತ್ರೆಯಲ್ಲಿ ಡಿಜೆ ಸಾಂಗ್ಸ್ ಹಾಕಿ ಕುಣಿದು ಕುಪ್ಪಳಿಸಿ ಅಂತಿಮ ವಿದಾಯ ಸಲ್ಲಿಸಿದ್ದಾರೆ. ಖುಷಿ-ಖುಷಿಯಾಗಿ ನಡೆದ ಈ ವಿಭಿನ್ನ ಅಂತಿಮ ಯಾತ್ರೆಯ ಬಳಿಕ ಧಾರ್ಮಿಕ ವಿಧಿವಿಧಾನಗಳ ಪ್ರಕಾರ ಪಾರ್ಥಿವ ಶರೀರದ ಅಂತ್ಯಕ್ರಿಯೆ ನೆರವೇರಿಸಲಾಗಿದೆ. ಇಲ್ಲಿನ ಪಶ್ಚಿಮ ಬಂಗಾಳದ ಉತ್ತರ 24 ಪರಗಣ ಎಂಬ ಜಿಲ್ಲೆಯ ಹಬ್ರಾ ಎಂಬಲ್ಲಿ ಇಂಥದ್ದೊಂದು ಕುತೂಹಲಕಾರಿ ಘಟನೆ ನಡೆಯಿತು.
ನೂರಾರು ಮೊಮ್ಮಕ್ಕಳ ಅಗಲಿದ ಶತಾಯುಷಿ: ಹಬ್ರಾ ಪೊಲೀಸ್ ಠಾಣೆಯ ಕುಮ್ರಾ ಗ್ರಾಮ ಪಂಚಾಯಿತಿಯ ಪಡುಯಿಪರದ ನಿವಾಸಿ ದೇಬೆನ್ ಹಜ್ರಾ 1903 ರಲ್ಲಿ ಜನಿಸಿದ್ದರು. 119 ವರ್ಷಗಳ ಕಾಲ ಬಾಳಿ ಬದುಕಿದ ಹಿರಿಜೀವ ಅದು. ದೇಬೆನ್ಗೆ ಇಬ್ಬರು ಕಿರಿ ಸಹೋದರರಿದ್ದು ಬಹಳ ವರ್ಷಗಳ ಹಿಂದೆಯೇ ತೀರಿಕೊಂಡಿದ್ದಾರೆ. ಈ ವೃದ್ಧನಿಗೆ ಇಬ್ಬರು ಪುತ್ರರು ಮತ್ತು ಮೂವರು ಪುತ್ರಿಯರಿದ್ದಾರೆ. 150 ಜನರಿರುವ ತುಂಬು ಕುಟುಂಬ ಇವರದ್ದು.
ದೇಬೆನ್ರಿಗೆ ಸಂಗೀತವೆಂದರೆ ಅಚ್ಚುಮೆಚ್ಚು. ಸುತ್ತಮುತ್ತಲಿನ ಹಳ್ಳಿಗಳಲ್ಲಿ ಎಲ್ಲೇ ಆದರೂ ನಾಟಕಗಳು ನಡೆದರೆ ನೋಡಲು ತೆರಳುತ್ತಿದ್ದರಂತೆ. ಮನೆಯಲ್ಲಿಯೂ ಕೂಡ ಹಾಡುಗಳನ್ನು ಕೇಳಿ ಆನಂದಿಸುತ್ತಾ ಮೊಮ್ಮಕ್ಕಳೊಂದಿಗೆ ಸಮಯ ಕಳೆಯುತ್ತಿದ್ದರು ಎಂದು ಕುಟುಂಬ ಸದಸ್ಯರು ಸ್ಮರಿಸುತ್ತಾರೆ.
ಇದನ್ನೂ ಓದಿ: ನ್ಯಾಯ,ನಿಷ್ಠೆ,ಪ್ರಾಮಾಣಿಕತೆ ಕಣ್ಮರೆಯಾಗುತ್ತಿರುವುದು ಬೇಸರದ ಸಂಗತಿ.. ಶತಾಯುಷಿ ಹುಲಿಕಲ್ ನಾಗಭೂಷಣ