ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ನಡೆದ ಸಚಿವ ಸಂಪುಟದಲ್ಲಿ ಮಹತ್ವದ ನಿರ್ಧಾರ ಕೈಗೊಳ್ಳಲಾಗಿದ್ದು, ದೇಶದ 5 ಕೋಟಿ ಕಬ್ಬು ಬೆಳೆಯುವ ರೈತರಿಗೆ ಸಿಹಿ ಸುದ್ದಿ ನೀಡಿದೆ. ಪ್ರತಿ ಕ್ವಿಂಟಲ್ ಕಬ್ಬಿನ ಮೇಲೆ ಎಫ್ಆರ್ಪಿ (Fair and Remunerative Price) ಹೆಚ್ಚಿಸಲು ಇಂದಿನ ಸಭೆಯಲ್ಲಿ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಕೇಂದ್ರ ಸಚಿವ ಪಿಯೂಷ್ ಗೋಯಲ್ ಮಾಹಿತಿ ನೀಡಿದ್ದಾರೆ.
ಸಚಿವ ಸಂಪುಟ ಸಭೆ ನಡೆದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಭಾಗಿಯಾಗಿ ಮಾತನಾಡಿದ ಪಿಯೂಷ್ ಗೋಯಲ್, ಕಬ್ಬು ಬೆಳೆಗಾರರ ಹಿತದೃಷ್ಟಿ ಕಾಪಾಡುವ ಉದ್ದೇಶದಿಂದ ಮುಂದಿನ ಬೆಳೆಗೆ ಅನ್ವಯವಾಗುವ ರೀತಿಯಲ್ಲಿ ಪ್ರತಿ ಕ್ವಿಂಟಲ್ ಕಬ್ಬಿನ ಮೇಲೆ 290 ರೂ. ಎಫ್ಆರ್ಪಿ ಏರಿಕೆ ಮಾಡಲಾಗಿದೆ ಎಂದರು. ಇದರಿಂದ ದೇಶದ 5 ಕೋಟಿ ಕಬ್ಬು ಬೆಳೆಗಾರರು ಇದರ ಲಾಭ ಪಡೆದುಕೊಳ್ಳಲಿದ್ದಾರೆ.
ಇದನ್ನೂ ಓದಿರಿ: ಮಿಗ್-21 ಬೈಸನ್ ಫೈಟರ್ ಏರ್ಕ್ರಾಫ್ಟ್ ಪತನ..ಧಗಧಗನೇ ಹೊತ್ತಿ ಉರಿದ ಯುದ್ಧ ವಿಮಾನ
ಏನಿದು ಎಫ್ಆರ್ಪಿ?: ಕೇಂದ್ರ ಕಬ್ಬು ಬೆಳೆಗಾರರಿಗೆ ನೀಡುವ ಪ್ರೋತ್ಸಾಹದಾಯಕ ದರವಾಗಿದ್ದು, ಮುಂದಿನ ಸೀಸನ್ಗೆ ಅನ್ವಯವಾಗುವಂತೆ ಇದರಲ್ಲಿ 5 ರೂಪಾಯಿ ಏರಿಕೆ ಮಾಡಿದೆ. ಕಬ್ಬಿನಿಂದ ಉತ್ಪಾದನೆಗೊಳ್ಳುವ ಸಕ್ಕರೆ ಶೇ. 10ರಷ್ಟಾಗಿದ್ದರೆ ಕಬ್ಬು ಬೆಳೆಗಾರರಿಗೆ 290 ರೂ ಸಿಗಲಿದೆ
ಕಬ್ಬಿನಿಂದ ಉತ್ಪಾದಿಸಲಾದ ಸಕ್ಕರೆ ಪ್ರಮಾಣ ಎಷ್ಟು ಎಂಬುದೇ ಎಫ್ಆರ್ಪಿ. ಶೇ. 10ರಷ್ಟು ಎಫ್ಆರ್ಪಿ ಎಂದರೆ 1 ಕ್ವಿಂಟಲ್ ಕಬ್ಬಿನಿಂದ 10 ಕೆಜಿ ಸಕ್ಕರೆ ತಯಾರಿಸಬಹುದು. ಈ ಯೋಜನೆಯಿಂದ ಮುಂದಿನ ಸೀಸನ್ನಲ್ಲಿ ಸುಮಾರು 1 ಲಕ್ಷ ಕೋಟಿ ರೂ. ರೈತರಿಗೆ ಹೆಚ್ಚುವರಿಯಾಗಿ ಸಿಗಲಿದೆ.
2020-21ನೇ ಸಾಲಿನಲ್ಲಿ 2,976 ಲಕ್ಷ ಟನ್ (91,000 ಕೋಟಿ ರೂ ಮೌಲ್ಯ) ಕಬ್ಬು ವಿವಿಧ ಕಾರ್ಖಾನೆಗಲ್ಲಿ ನುರಿಸಲಾಗಿದ್ದು, ಮುಂದಿನ ವರ್ಷ 3,088 ಲಕ್ಷ ಟನ್ ನುರಿಸುವ ಉದ್ದೇಶ ಇಟ್ಟುಕೊಳ್ಳಲಾಗಿದೆ ಎಂದು ಕೇಂದ್ರ ಸಚಿವರು ತಿಳಿಸಿದರು.
