ಕೊಟ್ಟಾಯಂ: ಕೇರಳದಲ್ಲಿ ನಡೆದಿದ್ದ ದಲಿತ ಕ್ರೈಸ್ತ ಯುವಕ ಕೆವಿನ್ ಜೋಸೆಫ್ ಕೊಲೆಯನ್ನು ಮರ್ಯಾದೆ ಹತ್ಯೆ ಎಂದು ಒಪ್ಪಿಕೊಂಡಿರುವ ಕೊಟ್ಟಾಯಂ ಕೋರ್ಟ್, ಬಂಧಿತ 14 ಮಂದಿ ಪೈಕಿ 10 ಮಂದಿಯನ್ನು ತಪ್ಪಿತಸ್ಥರು ಎಂದು ಒಪ್ಪಿಕೊಂಡಿದ್ದು, ಈ ಪೈಕಿ ಕೆವಿನ್ ಪ್ರೀತಿಸುತ್ತಿದ್ದ ಯುವತಿಯ ಸಹೋದರನೂ ಸೇರಿದ್ದಾನೆ.
ಶಿಕ್ಷೆಯ ಅವಧಿಯನ್ನು ಕೋರ್ಟ್ ಇನ್ನೂ ನಿಗದಿ ಮಾಡಿಲ್ಲ. 2018ರ ಮೇನಲ್ಲಿ ಈ ಪ್ರಕರಣ ಜರುಗಿತ್ತು. ಕೆವಿನ್ ಎಂಬ ಯುವಕ ನೀನು ಚಾಕೊ ಎಂಬಾಕೆಯನ್ನು ಪ್ರೀತಿಸುತ್ತಿದ್ದ. ಈ ವಿಷಯ ಯುವತಿಯ ಮನೆಯವರಿಗೂ ಗೊತ್ತಾಗಿದ್ದು, ಕೆವಿನ್ ದಲಿತ ಕ್ರೈಸ್ತ ಎಂಬುದನ್ನು ಅರಿತ ಅವರು ಇಬ್ಬರ ವಿವಾಹಕ್ಕೆ ಅಡ್ಡಿಪಡಿಸಿದ್ದರು.
ಮನೆಯಿಂದ ಹೊರಬಂದು ಮದುವೆಯಾಗಿ ವಿವಾಹ ನೋಂದಣಿಗಾಗಿ ಇಬ್ಬರೂ ಅರ್ಜಿ ಸಲ್ಲಿಸಿದ್ದರು. ಸಮ್ಮತಿ ಸಿಗಲು ಕೆಲ ದಿನ ತಡವಾದ್ದರಿಂದ ನೀನು ಚಾಕೋಳನ್ನು ಹಾಸ್ಟೆಲ್ನಲ್ಲಿ ಇರಿಸಲಾಗಿತ್ತು. ಕವಿನ್ ಆತನ ಸಂಬಂಧಿ ಅನೀಶ್ ಮನೆಯಲ್ಲಿದ್ದ.
ಮರುದಿನ ಕೆವಿನ್ ಹಾಗೂ ಅನೀಶ್ನನ್ನು ನೀನು ಸಹೋದರ ಸ್ಯಾನು ಚಾಕೊ ಹಾಗೂ ಅವನ ಸ್ನೇಹಿತರು ಅನೀಶ್ ಹಾಗೂ ಕೆವಿನ್ ಇಬ್ಬರನ್ನೂ ಅಪಹರಿಸಿದ್ದರು. ಅನೀಶ್ನನ್ನು ಬಿಡುಗಡೆ ಮಾಡಲಾಯಿತು. ಅದೇ ದಿನ ಕೆವಿನ್ನ ಮೃತ ದೇಹವು ಒಂದು ನಾಲೆಯಲ್ಲಿ ಪತ್ತೆಯಾಗಿತ್ತು. ಆತನನ್ನು ನೀರಿನಲ್ಲಿ ಬಲವಂತವಾಗಿ ಮುಳುಗಿಸಿ ಕೊಲ್ಲಲಾಗಿದೆ ಎಂದು ಶವಪರೀಕ್ಷೆ ವರದಿಯಲ್ಲಿ ತಿಳಿಸಲಾಗಿತ್ತು.
ಪ್ರಕರಣ ಸಂಬಂಧ ನೀನು ಚಾಕೊಳ ತಂದೆ ಜಾನ್ ಚಾಕೊ ಅವರನ್ನೂ ಬಂಧಿಸಲಾಗಿದ್ದು, ಅವರನ್ನು ನಿರ್ದೋಷಿ ಎಂದು ಪರಿಗಣಿಸಿ ಬಿಡುಗಡೆ ಮಾಡಲಾಗಿದೆ.
