Vrindavan News: બાંકે બિહારી મંદિર પાસે જર્જરિત મકાનની બાલ્કની ધરાશાયી, 5 ભક્તોના મોત, અનેક ઈજાગ્રસ્ત

મથુરા: 15 ઓગસ્ટના રોજ વૃંદાવનમાં બાંકે બિહારી મંદિરથી થોડા અંતરે બનેલા ત્રણ માળના મકાનની દિવાલ અચાનક ધરાશાયી થઈ ગઈ હતી. સ્થાનિક લોકો સાથે અનેક શ્રદ્ધાળુઓ તેની નીચે દટાઈ ગયા હતા. પાંચ લોકોના ઘટનાસ્થળે જ મોત થયા હતા, જ્યારે અનેક લોકો ઈજાગ્રસ્ત થયા હતા. ભારે જહેમત બાદ પોલીસે કાટમાળમાં દટાયેલા લોકોને બહાર કાઢ્યા હતા. ઇજાગ્રસ્તોને સારવાર માટે હોસ્પિટલમાં દાખલ કરવામાં આવ્યા હતા. સાથે જ મૃતદેહોને પોસ્ટમોર્ટમ માટે મોકલી દેવામાં આવ્યા છે. આ સમગ્ર ઘટનાના CCTV ફૂટેજ સામે આવ્યા છે.

5 ભક્તોના મોત: સ્થાનિક લોકોના જણાવ્યા અનુસાર, ઇમારત પહેલાથી જ જર્જરિત હતી. ઇમારતમાં મોટી સંખ્યામાં વાંદરાઓ રહેતા હતા. વરસાદના કારણે બિલ્ડીંગની હાલત વધુ ગંભીર બની ગઈ હતી. મંગળવારે સાંજે અચાનક ઘરની બાલ્કની નીચે પડી હતી, જેની નીચેથી બહાર આવતા ભક્તો તેની લપેટમાં આવી ગયા હતા. ચીસો સાંભળીને આસપાસના વિસ્તારમાં અફરા-તફરી મચી ગઈ હતી. ઘટનાની જાણ પોલીસને કરવામાં આવી હતી, જે બાદ પોલીસે કાટમાળ નીચે દટાયેલા લોકોને બહાર કાઢ્યા હતા. જેમાં પાંચ લોકોના મોત થયા હતા.