વડોદરાઃ શહેરના ભીમનાથ બ્રિજ પાસે એક સ્કૂલવાન ઝાડ સાથે ધડાકાભેર ટકરાઈ હતી. આ વાન કેન્દ્રીય વિદ્યાલય-2 તરફ જઈ રહી હતી. આ વાનના આગળના ભાગનો કચ્ચરઘાણ નીકળી ગયો હતો. ચાલકને મહા મુસિબતે ફાયર બ્રિગેડના જવાનોએ બહાર કાઢ્યો હતો.

સમગ્ર ઘટનાક્રમઃ કેન્દ્રીય વિદ્યાલય-2 તરફ જઈ રહેલી સ્કૂલવાન વડોદરાના ભીમનાથ બ્રિજ પાસેથી એક વિદ્યાર્થીની સાથે પસાર થઈ રહી હતી. આ સ્કૂલવાન એક ઝાડ સાથે ધડાકાભેર ટકરાઈ હતી. આ અકસ્માતમાં સ્કૂલવાનના આગળના ભાગનો કચ્ચરઘાણ નીકળી ગયો હતો. સ્કૂલવાનનો 20 વર્ષીય અજય ભરવાડ નામક ચાલક ધાયલ અવસ્થામાં આ વાનમાં ફસાઈ જવા પામ્યો હતો. તેના બંને પગ વાનના ડેમેજ ભાગમાં અટવાઈ ગયા હતા. જો કે વાનમાં હાજર વિદ્યાર્થીનીને કોઈ ઈજા થવા પામી નહતી. વિદ્યાર્થીનીના વાલીને જાણ કરતા તેઓ ઘટના સ્થળે ધસી આવ્યા હતા અને વિદ્યાર્થીનીને ઘરે લઈ ગયા હતા. ઘાયલ ચાલકને તુટેલી વાનમાંથી બહાર કાઢવા માટે ફાયર બ્રિગેડની મદદ લેવી પડી હતી. દાંડીયા બજાર ફાયર બ્રિગેડની ટીમ તાત્કાલિક ઘટનાસ્થળે પહોંચી ગઈ હતી. તેમણે ડેમેજ વાનના કેટલાક ભાગોને કાપીને ઈજાગ્રસ્ત ચાલકને મહા મુસિબતે બહાર કાઢ્યો હતો.

ભીમનાથ બ્રિજ પાસે અકસ્માતનો કોલ મળતા જ ફાયર બ્રિગેડની ટીમ ઘટના સ્થળે દોડી આવી હતી.જેનો અકસ્માત થયો હતો તે વાહન સ્કૂલવાન હોવાનું માલુમ પડ્યું હતું. કારનો આગળનો ભાગ ડેમેજ થઈ ગયો હતો જેમાંથી ચાલકને મહામુસિબતે બહાર કાઢવામાં આવ્યો હતો. આ ગંભીર અકસ્માતમાં ચાલકનો બચાવ થયો હતો...ગુરુનાથ નાયક(ઓફિસર, દાંડીયા બજાર ફાયર બ્રિગેડ, વડોદરા)

સ્કૂલવાન સેફ્ટી આવશ્યકઃ આ અકસ્માત ગ્રસ્ત સ્કૂલવાનમાં ફાયર સેફ્ટિના કોઈ સાધનો નહતા. જો એકાએક આગ લાગે તો આગને કાબુમાં કરી શકાય તેવી વ્યવસ્થાનો સદંતર અભાવ હતો. આ ઉપરાંત સ્કૂલવાનમાં હંમેશા નિર્ધારિત કરતા વધુ વિદ્યાર્થીઓની સંખ્યા જોવા મળે છે. વિદ્યાર્થીઓ જીવના જોખમે સ્કૂલવાનમાં મુસાફરી કરે છે. આ મુદ્દે તંત્ર દ્વારા તત્કાળ કાર્યવાહી કરવાની લોકમાંગણી ઉઠી હતી.

1. બાઇક અને સ્કૂલવાન વચ્ચે સર્જાયો ગમખ્વાર અકસ્માત, બાઇક ચાલકનું ઘટના સ્થળે જ મોત
2. સુરતમાં સ્કૂલવાન તથા રિક્ષાચાલકો દ્વારા ભાડામાં વધારો કરતા વાલીઓમાં રોષ