સુરતમાં વેક્સિનેશન મોકડ્રિલ : વેક્સીન ડ્રાય રન માટે તમામ ઝોન સેન્ટરમાં તૈયારીઓ પૂર્ણ

વિશ્વના સૌથી મોટા વેક્સિનેશન મિશનમાં 2 જાન્યુઆરીથી સુરત ખાતે વેક્સિનેશન ડ્રાય રન શરૂ થશે. આ માટે સુરત મહાનગર પાલિકા દ્વારા તડામાર તૈયારીઓ કરવામાં આવી છે સર્વે અને રજિસ્ટ્રેશનની કામગીરી પણ છેલ્લા તબક્કામાં છે અને આ ખાસ વેક્સીન ડ્રાય રન માટે તમામ ઝોનમાં સેન્ટરમાં તૈયારીઓ પૂર્ણ કરી દેવામાં આવી છે.

• સુરતમાં તમામ ઝોનમાં વેક્સિનેશનને લઇ ડ્રાય રન
• 2 જાન્યુઆરીથી શરુ થશે ડ્રાય રન
• કોરોના વેક્સિનેશન સરળતાથી થાય તે ચકાસવા મોકડ્રિલ

સુરતઃ કોરોના સંક્રમણના વચ્ચે સૌથી સુખદ સમાચાર છે કે લોકોને હવે ટૂંક સમયમાં વેક્સિનેશન મળી શકશે. આ માટે કેન્દ્ર અને રાજ્ય સરકારે તમામ તૈયારીઓ લગભગ પૂર્ણ કરી છે. ત્યારે સુરત મહાનગરપાલિકા દ્વારા પણ શહેરીજનોને વેક્સિનેશનમાં કોઈપણ બાધા ઉત્પન્ન ન થાય આ માટે તમામ તૈયારીઓને આખરી ઓપ આપવામાં આવી દીધો છે. સૌથી અગત્યની વાત આ છે કે, બીજી જાન્યુઆરીના રોજ સુરત મહાનગરપાલિકા તમામ ઝોનમાં વેક્સિનેશન ને લઇ ડ્રાય રન કરવા જઈ રહી છે. આ ખાસ પ્રકારની મોકડ્રિલ રહેશે જેથી આવનાર દિવસોમાં જ્યારે લોકોને વેક્સિનેશન આપવામાં આવે ત્યારે કોઈપણ પ્રકારની સમસ્યા ઉભી ન થાય.

30 મિનિટ સુધી લોકોને વેક્સિનેશન બાદ આ સેન્ટરમાં રખાશે

સુરતના મ્યુનિસિપલ કમિશનર બંછાનિધી પાનીએ જણાવ્યું હતું કે આ ખાસ ડ્રાયરન માટે તમામ ઝોનમાં બે સેન્ટરમાં તૈયારીઓ કરવામાં આવી છે. 30 મિનિટ સુધી લોકોને વેક્સિનેશન બાદ આ સેન્ટરમાં રહેવાનું રહેશે સેન્ટરમાં ત્રણ ભાગ કરવામાં આવ્યાં છે. જેમાં રજિસ્ટ્રેશન વેક્સિનેશન અને ઓબ્ઝર્વેશનની સુવિધા લોકોને મળી રહેશે. કોઈ આડઅસર થાય તો સેન્ટરમાં જ સુવિધા ઉપલબ્ધ રહેશે અને સેન્ટરને અન્ય હોસ્પિટલ સાથે પણ જોડી દેવામાં આવ્યાં છે જેથી તાત્કાલિક સારવાર મળી રહે.