પાટણ: હેમચંદ્રાચાર્ય ઉત્તર ગુજરાત યુનિવર્સિટીનાં (Patan HNG North Gujarat University) MBBSના 3 વિદ્યાર્થીઓને ઉત્તરવહી બદલી નાપાસમાંથી પાસ કરવાનો ગુણ સુધારણા કૌભાંડ (Marks Improvement Scam) બહાર આવ્યુ હતું . બહુ ગાજેલા આ કૌભાંડની (Marks Improvement Scam in HNGU) રાજયના ગૃહ સચિવ પંકજકુમાર દ્વારા તપાસ કરવામાં આવતા સરકારે હાલના કુલપતિ અને તત્કાલીન પુનઃમૂલ્યાંકન સમિતિના કન્વીનર ડો.જે.જે.વોરા અને અન્ય જવાબદાર કર્મચારીઓને દોષિત ઠેરવી તમામ સામે કાર્યવાહી કરવા આદેશ કર્યો હતો.
દોષિતો સામે કાર્યવાહી માટે માંગી મુદત
કુલપતિએ સરકાર સમક્ષ સાચા દોષિતો સામે કાર્યવાહી થાય તે માટે મુદત માંગતા 1 માસનો સમય આપવામાં આવ્યો હતો. જે મુદત તા 15મી ડિસેમ્બેર પૂર્ણ થતાં સરકારના આદેશ મુજબ આ સમગ્ર કૌભાંડના દોષિતો સામે શું કાર્યવાહી કરવી તેને લઇ ગુરુવારે કારોબારીની બેઠક બોલાવવામાં આવી હતી.
સાડા ત્રણ કલાકની મેરેથોન બેઠક ચાલી
કુલપતિ ડો . જે.જે.વોરાની ગેરહાજરીમાં કાર્યકારી કારોબારી અધ્યક્ષ દિલીપ ચૌધરીના અધ્યક્ષસ્થાને મળેલી આ કારોબારી બેઠકમાં (Executive meeting of the University) તમામ સભ્યો હાજર રહ્યા હતા . જેમાં 2 સભ્યોએ ઓનલાઇન ચર્ચામાં ભાગ લીધો હતો . જયારે ઉચ્ચ શિક્ષણ વિભાગના (Department of Education) નાયબ નિયામક મહેશભાઇ મહેતા પણ ખાસ હાજર રહ્યા હતા . અંદાજે સાડા ત્રણ કલાક ચાલેલી આ મેરેથોન બેઠકમાં લંબાણપૂર્વકની ગહનચર્ચાઓ બાદ સર્વાનુમતે કુલપતિ સહિત સ્ટાફ સામે ચાર્જશીટ આપવાનો નિર્ણય લેવામાં આવ્યો હતો.
તમામ દોષિતને સાત દિવસમાં ચાર્જશીટ આપવામાં આવશે
દીલિપ ચૌધરીએ પત્રકારોને જણાવ્યું હતું કે, આ કારોબારીમાં સર્વાનુમતે નિર્ણય લેવામાં આવ્યો છે, કે આ ગુણ સુધારણા કૌભાંડમાં સરકાર દ્વારા દોષિત ઠરેલા તમામને સાત દિવસમાં ચાર્જશીટ આપવામાં આવશે અને તેમના ખુલાશા પુછવામાં આવશે જે રજૂ થયા બાદ આગળની કાર્યવાહી કરવામાં આવશે. જો કે આ કૌભાંડ મામલે કુલપતિની હકાલપટ્ટી હાલ પુરતી ટળી છે.
આ પણ વાંચો:
પાટણ HNG યુનિવર્સિટીમા MBBS ગુણ સુધારણા કૌભાંડમાં કુલપતિ સહિતનો સ્ટાફ દોષિત
