જૂનાગઢમાં વરસાદને પગલે થયેલા નુકસાનથી ખેડૂતોએ આવેદનપત્ર પાઠવ્યું

જૂનાગઢઃ કમોસમી વરસાદથી જૂનાગઢ જિલ્લાના ખેડૂતો હવે પારાવાર મુશ્કેલીનો સામનો કરી રહ્યા છે. જૂનાગઢ શહેર અને તાલુકામાં પડેલા ભારે વરસાદને કારણે ખેડૂતોનો મહામૂલો પાક બગડી રહ્યો છે, જેને લઈને ખેડૂતોએ કલેકટરને આવેદનપત્ર પાઠવ્યું હતું.

જૂનાગઢ શહેરમાં પડી રહેલા કમોસમી વરસાદને કારણે ખેડૂતો હવે પારાવાર મુશ્કેલીનો સામનો કરી રહ્યા છે. ગઈકાલે બપોર બાદ જૂનાગઢ શહેર અને આસપાસના વિસ્તારોમાં અચાનક વાતાવરણમાં પલટો જોવા મળ્યો હતો, જેને કારણે ધોધમાર વરસાદ પડતાં ખેતરોમાં ચોમાસાની માફક પાણી ફરી વળ્યા હતાં. જૂનાગઢ તાલુકાના ઝાલણસર સહિત આસપાસના ગામોમાં ધોધમાર બે ઈંચ જેટલો વરસાદ પડતા ખેડૂતોને મગફળી અને કપાસનો પાક નિષ્ફળ નીવડ્યો હતો. જેને લઇને ખેડૂતો હવે આક્રમક બનતા પણ જોવા મળી રહ્યા છે.

જૂનાગઢ જિલ્લાના જાલણસર સહિત આસપાસના 5 ગામોમાં ધોધમાર ૩ ઇંચ જેટલો વરસાદ પડયો હતો, જેને લઇને ખેડૂતનો તૈયાર પાક હવે બગડી રહ્યો છે. ખેડૂતો માગ કરી રહ્યા છે કે સરકાર દ્વારા નુકસાનીનો તાકીદે સર્વે કરવામાં આવે અને ખેડૂતોને કમોસમી વરસાદથી જે નુકસાન થયું છે, તેનું વળતર અને ખેડુતો દ્વારા જે પાક વીમા પ્રીમીયમ ભરવામાં આવ્યા છે તેવા તમામ ખેડુતોને પાક વિમો તાકીદે મળે તેવી માગ કરતું આવેદન પત્ર જૂનાગઢ જિલ્લા કલેકટરને પાઠવ્યું હતું.