અમરેલી જિલ્લાના રાજુલા તાલુકાના બારપટોળી ગામમાં અસામાજિક તત્ત્વો દ્વારા મચાવેલા આતંકનો વીડિયો વાઈરલ થયો હતો. બે દિવસ પહેલા તાલુકાના બારપટોળી ગામમાં કેટલાક અસામાજીક ઈસમો બાઈક પર ધોકા અને તલવાર જેવા દેખાતા હથિયારો સાથે ગામમાં ધસી આવ્યા હતા. તે દરમિયાન તેમને બળજબરીપૂર્વક દુકાનો બંધ કરાવી હતી. ગામલોકોને ધમકી પણ આપી હતી. પોતાનો ખોફ ઉભો કરવા માંગતા હોય તેવું વીડિયોમાં સ્પષ્ટપણે જોઈ શકાય છે.
આ વીડિયો રવિવારે સોશિયલ મીડિયામાં વાઇરલ થયો છે, જેને લઇને રાજુલા પોલીસ તપાસ કરી રહી હતી. આ વીડિયોમાં દેખાતા ત્રણ અસામાજિક તત્ત્વોને પોલીસે પકડી લીધા છે. તેમના વિરૂદ્ધ કાયદેસરની કાર્યવાહી હાથ ધરી છે. તેમજ વધુ કેટલાક અસામાજિક તત્ત્વોને પકડવા માટે ચક્રો ગતિમાન કર્યા છે.
બે દિવસ પહેલા બારપટોળી ગામમાં અસામાજિક તત્ત્વોએ મચાવેલા આતંકને કારણે લઇને ગામમાં ભયનું વાતાવરણ ફેલાઈ ગયું હતું. આતંક મચાવનાર અસામાજિક તત્ત્વો પૈકીના ત્રણ ઈસમો પોલીસના હાથે ઝડપાઇ જતા ગામલોકોના ભય થોડો ઓછો થયો છે, પરંતુ અવાર-નવાર બનતી આવી ઘટનાઓને કારણે પોલીસ આવા તત્ત્વો સામે આકરા પગલા ભરે, તેવી માગ ગામલોકો કરી રહ્યા છે.