વીમા યોજના હેઠળ ક્લેઈમ મેળવવા માટે લાભાર્થી પુરવાર કરવું જરૂરી: કોર્ટ

વર્ષ 2011માં વાહન અકસ્માતમાં ડાબો હાથ ગુમાવનારા વ્યક્તિની પત્નીએ ગુજરાત રાજ્ય સામૂહિક જૂથ અકસ્માત વીમા યોજના હેઠળ વળતર મેળવવા માટેની અરજી અમદાવાદ ગ્રાહક તકરાર નિવારણ કમિશન દ્વારા ફગાવી દેવામાં આવી છે. ગ્રાહક તકરાર નિવારણ કમિશન દ્વારા જણાવવામાં આવ્યું કે, અરજદાર પીડિત વ્યક્તિ વતી અસંગઠિત શ્રમિકની (ગ્રાહક) વ્યાખ્યામાં આવે તેવો કોઈ પુરાવો રેકોર્ડ ઉપર પુરવાર કરી શક્યા નથી. જેથી સંબંધિત વીમા યોજના હેઠળ ક્લેઈમ મેળવવા તેઓ હકદાર રહેતા નથી.

અમદાવાદ: ગ્રાહક તકરાર નિવારણ કમિશને તેના ચુકાદામાં જણાવ્યું હતું કે, અરજદાર તેમના પતિ ક્યા પ્રકારનું મજૂરી કામ કરતા હતા તે અંગે કોઈ વિગત રજૂ કરી નથી. તેથી અરજદાર ગુજરાત સામૂહિક જૂથ અકસ્માત વીમા યોજના હેઠળ ક્લેઈમ મેળવવા હકદાર ગણી શકાય નહીં.

અરજદારના વકીલ દ્વારા દલીલ કરવામાં આવી હતી કે, આ વીમા યોજના હેઠળ સરકાર દ્વારા પ્રિમિયમ ભરવામાં આવે છે. તેથી તેમને યોજનાનો લાભાર્થી એટલે કે ગ્રાહક માનવામાં આવે. ડાયરેક્ટર ઓફ ઈન્શ્યોરન્સ વતી વકીલે દલીલ કરતા જણાવ્યું હતું કે, મૃત્યુ પામનારી વ્યક્તિ મજૂરી કામ કરતા તે અંગેનો પુરાવો રજૂ કરી શક્યા નથી. જેથી તેમને યોજનાનો લાભ આપી શકાય નહીં.