তিনচুকীয়া, 3 এপ্ৰিল : অৱশেষত আৰক্ষীৰ জালত পৰিল বিতৰ্কিত অৰবিন্দ সিং ৷ অসমীয়া ভাষা আৰু অসমীয়াক কটু মন্তব্য কৰা বিতৰ্কিত অৰবিন্দ সিঙে দেওবাৰে আত্মসমৰ্পণ কৰে তিনিচুকীয়া সদৰ থানাত । ইয়াৰ পাচতেই এতিয়া নিজৰ প্ৰতিক্ৰিয়া প্ৰকাশ কৰিছে একাংশ দল সংগঠনৰ সদস্যই ৷
উল্লেখ্য যে, বিগত ৩০ মাৰ্চৰ নিশা এক ফোন কলৰ যোগে অসমীয়া ভাষা আৰু অসমীয়াক কটু মন্তব্য কৰিছিল বিহাৰী সম্প্ৰদায়ৰ অৰবিন্দ সিং নামৰ এজন ব্যক্তিয়ে (Insult to Assam and Assamese people) ৷ তাৰ পাচতে এই অডিঅ’ ক্লিপটোক লৈ ৰাজ্যজুৰি সৃষ্টি হয় তীব্ৰ চাঞ্চল্যৰ ৷ ঘটনা সন্দৰ্ভত তিনিচুকীয়া সদৰ থানাত কেইবাটাও দল সংগঠনে দাখিল কৰে এক এজাহাৰ ৷
অডিঅ’ ৰেকৰ্ডিঙটোত লোকজনে তিনিচুকীয়াত ৱাৰ্ড কমিচনাৰৰ পৰা মন্ত্ৰী-বিধায়কলৈ সকলো বিহাৰী লোক হ’ব বুলিও ভাবুকি প্ৰদান কৰিছিল ৷ তাৰ পাচতে সৰ্বত্ৰে এই সন্দৰ্ভত সৃষ্টি হয় তীব্ৰ প্ৰতিক্ৰিয়াৰ ৷ শীঘ্ৰে প্ৰশাসনক সাম্প্ৰদায়িক বিষবাষ্প বিয়পোৱা দোষী ব্যক্তিজনক চিনাক্ত কৰাৰ লগতে গ্ৰেপ্তাৰ কৰি দৃষ্টান্তমূলক শাস্তি বিহাৰ দাবী জনাইছিল সদৌ তিনিচুকীয়া জিলা ছাত্ৰ সন্থাৰ লগতে কেইবাটাও দল সংগঠনে ৷
আনহাতে, দেওবাৰে সংবাদ মাধ্যমৰ আগত নিজৰ ভুল স্বীকাৰ কৰে বিতৰ্কিত অৰবিন্দ সিঙে । তাৰ পাচতেই আৰক্ষীয়ে নিজৰ জিম্মাত লয় অৰবিন্দ সিঙক ৷ তথ্য অনুসৰি, বৰ্তমানেও তিনিচুকীয়া সদৰ থানাত বিতৰ্কিত অৰবিন্দ সিঙক মাৰাথন জেৰা অব্যাহত ৰাখিছে আৰক্ষীয়ে ।
লগতে পঢ়ক : অসম আৰু অসমীয়াক চৰম অপমান এগৰাকী অনা অসমীয়াৰ
