আমগুৰি ২৬ অক্টোবৰ: শিৱসাগৰ জিলাৰ আমগুৰি পশু চিকিৎসালয়ত নীতি বৰ্হিভূতভাৱে দুজোপাকৈ মূল্যৱান গছ কটাক কেন্দ্ৰ কৰি প্ৰতিক্ৰিয়া সৃষ্টি হৈছে সচেতন মহলত । বিভিন্ন পক্ষক মেনেজ কৰি গছৰ কুণ্ডা লৈ যোৱাৰ অভিযোগ ৰাইজৰ ।
জানিব পৰা মতে, আমগুৰি পশু চিকিৎসালয়ৰ চাৰিসীমাৰ ভিতৰত থকা দুডাল ইউকেলিপ্টাছ গছ পকী বাউণ্ডেৰী দিয়াৰ নামত কাটি পেলোৱা হৈছিল । কিন্তু অসাধু ব্যৱসায়ীয়ে বন বিভাগৰ কোনো নীতি-নিয়ম নামানি গছ দুজোপা কাটি বন বিভাগক চমজাই দিয়াৰ পৰিৱৰ্তে বিভিন্ন পক্ষক মেনেজ কৰি গছৰ কুণ্ডা লৈ যোৱাৰ অভিযোগ উত্থাপন কৰিছে স্থানীয় ৰাইজে ।
উল্লেখ্য যে, আমগুৰি নগৰৰ মাজমজিয়াতে আমগুৰি বন বিভাগৰ কাৰ্যালয় থকাৰ পিছতো দুষ্ট চক্ৰই কেনেদৰে গছ দুজোপা কাটি নিবলৈ পালে তাক লৈ এক গভীৰ ৰহস্যৰ সৃষ্টি হৈছে । অতি শীঘ্ৰে উক্ত ঘটনাটোৰ লগত জড়িত লোকৰ বিৰুদ্ধে বিভাগীয় কৰ্তৃপক্ষক ব্যৱস্থা গ্ৰহণৰ দাবী জনাইছে সচেতন মহলে।
