আমগুৰি,24 মে’: আলফাৰ লগত স্থায়ী শান্তি আলোচনাৰ ইতিবাচক দিশৰ বাবে নেচনেল পিপলচ পাৰ্টিৰ অসম শাখাই ৰাজ্যৰ নৱ-নিৰ্বাচিত মুখ্যমন্ত্ৰী ড৹ হিমন্ত বিশ্ব শৰ্মাক শুভেচ্ছা জ্ঞাপন কৰে ৷ দেওবাৰে নেচনেল পিপলচ পাৰ্টিৰ অসম শাখাৰ তত্বাৱধায়ক বিশ্বজিৎ বৰুৱাই প্ৰেৰণ কৰা এক প্ৰেছ বিজ্ঞপ্তিৰ জৰিয়তে সদৰি কৰে এই কথা ৷
এই প্ৰেছ বিজ্ঞপ্তিত প্ৰকাশ কৰা অনুসৰি, এক দীঘলীয়া সময়ৰ অন্তত আলফা স্বাধীনৰ মুখ্য সেনাধক্ষ্য পৰেশ বৰুৱাৰ সৈতে মুখ্যমন্ত্ৰী ড৹ হিমন্ত বিশ্ব শৰ্মাই শান্তি আলোচনাৰ বাতাৱৰণ সৃষ্টিৰ বাবে জনোৱা উদগনিৰ হেতুকে মুখ্যমন্ত্ৰী গৰাকীক শুভেচ্ছা জ্ঞাপন কৰে নেচনেল পিপলচ পাৰ্টিৰ অসম শাখাই ৷
আনহাতে, নেচনেল পিপলচ পাৰ্টিৰ অসম শাখাই এই প্ৰেছ বিজ্ঞপ্তিৰ জৰিয়তে কা’ বিৰোধী আন্দোলনত সক্ৰিয়ভাৱে অংশগ্ৰহণ কৰি বিগত এবছৰে কাৰাবন্দী হৈ থকা শিৱসাগৰ সমষ্টিৰ নতুন বিধায়ক অখিল গগৈকো বিশেষভাৱে অভিনন্দন জ্ঞাপন কৰে ।
ইফালে ক’ভিডৰ প্ৰতিষেধক প্ৰত্যেকজন নাগৰিককে বিনামূলীয়াকৈ প্ৰদান কৰা, এই মহামাৰীৰ সময়চোৱাত জনতাক হাৰাশাস্তি নকৰা, অত্যাৱশ্যকীয় সামগ্ৰীৰ মূল্য বৃদ্ধি ৰোধ কৰা, ছাত্ৰ-ছাত্ৰীৰ পাঠ্যক্ৰম গ্ৰহণযোগ্য কৰি তোলা, বাৰিষাৰ পূৰ্বে মথাউৰীৰ কাম সম্পন্ন কৰিবলৈ চৰকাৰক আহ্বান জনাই নেচনেল পিপলচ পাৰ্টিৰ অসম শাখাই ।
লগতে পঢ়ক: কৰ’ণাৰ মাজতে লাইকা-দধীয়াবাসীৰ সন্মুখত পুনৰ আন এক প্ৰত্যাহ্বান
