নগাঁও, 15 ফেব্ৰুৱাৰী: অপৰাধীৰ বিৰুদ্ধে অভিযান তীব্ৰতৰ কৰি তুলিছে নগাঁও আৰক্ষীয়ে । পুনৰ এনকাউণ্টাৰ নগাঁও আৰক্ষীৰ (Encounter in Nagaon)। ড্ৰাগছ মাফিয়ালৈ লক্ষ্য কৰি নগাঁও আৰক্ষীৰ গুলী । আৰক্ষীক আক্ৰমণ কৰি পলায়নৰ চেষ্টা চলোৱাৰ অভিযোগ ড্ৰাগছ মাফিয়াৰ বিৰুদ্ধে। অপৰাধীৰ বিৰুদ্ধে কঠোৰ হৈয়েই আছে নগাঁও আৰক্ষী ।
আই পি এছ বিষয়া আনন্দ মিশ্ৰ বদলি হোৱাৰ পিছত বিভিন্নজনে উত্থাপন কৰিছিল বিভিন্ন প্ৰশ্নৰ । কিন্তু পূৰ্বৰ ধাৰাবাহিকতা অক্ষুণ্ণ ৰাখি অপৰাধীৰ বিৰুদ্ধে অভিযান তীব্ৰতৰ কৰি তুলিছে নগাঁও আৰক্ষীয়ে । অপৰাধীৰ বিৰুদ্ধে পূৰ্বতকৈ যেন দুগুণ কঠোৰ হৈছে এতিয়া নগাঁও আৰক্ষী । ৰাজ্যখনৰ ভিতৰতেই সৰ্বাধিক এনকাউণ্টাৰ সংঘটিত হোৱা নগাঁৱত পুনৰ সংঘটিত হ'ল ৷
প্ৰাক্তন ছাত্ৰনেতা নেতা কীৰ্তিকমল বৰাৰ এনকাউণ্টাৰ বিতৰ্কত সাঙোৰ খাই আই পি এছ বিষয়া আনন্দ মিশ্ৰ বদলি হৈ যোৱাৰ পিছতেই নগাঁও আৰক্ষীয়ে কৰিলে প্ৰথমটো এনকাউণ্টাৰ ৷ সোমবাৰে নিশা নগাঁও আৰক্ষীৰ এটা দলে নিষিদ্ধ ড্ৰাগছৰ বিৰুদ্ধে অভিযান চলায় নগাঁৱৰ জুৰীয়া বালিকটীয়া অঞ্চলত । দীৰ্ঘদিনে মাৰাত্মক ড্ৰাগছৰ বেহাৰ সৈতে জড়িত থকাৰ অভিযুক্ত বালিকটীয়াৰ ছাহজাহান ওৰফে ছাজুৰ ঘৰত অভিযান চলায় নগাঁও আৰক্ষীৰ এটা দলে । মাজনিশা চলা এই অভিযানতে ড্ৰাগছৰ বেহাত জড়িত ছাজুক আটক কৰিবলৈ সক্ষম হয় নগাঁও আৰক্ষী (Nagaon police shoots dreaded drug peddler, seize huge amount of contraband) । আৰক্ষীয়ে আটক কৰাৰ পিছতেই ড্ৰাগছ মাফিয়া ছাজুয়ে আৰক্ষীক আক্ৰমণ কৰি পলায়নৰ চেষ্টা কৰাৰ সময়তে আৰক্ষীয়ে বাধ্য হৈ চলাবলগীয়া হয় গুলী । আৰক্ষীৰ বেহু ফালি পলায়নৰ চেষ্টা চলোৱা ছাহজাহান ওৰফে ছাজু আহত হয় নগাঁও আৰক্ষীৰ গুলীত । ড্ৰাগছ ব্যৱসায়ী ছাজুৰ ঘৰৰ পৰা বুজন পৰিমাণৰ ড্ৰাগছো জব্দ কৰিবলৈও সক্ষম হয় অভিযানকাৰী আৰক্ষীৰ দলটো ।
আৰক্ষীৰ গুলীত আহত ড্ৰাগছ সৰবৰাহত অভিযুক্ত এইজন ছাহজহানক লগেলগে নগাঁও অসামৰিক চিকিৎসালয়ত ভৰ্তি কৰা হয় যদিও পুৱতি নিশাই উন্নত চিকিৎসাৰ বাবে ছাহজহানক প্ৰেৰণ কৰা হয় গুৱাহাটী চিকিৎসা মহাবিদ্যালয়লৈ । আনন্দ মিশ্ৰৰ বদলিৰ পিছত এইটোৱেই হৈছে নগাঁও আৰক্ষীৰ প্ৰথমটো এনকাউণ্টাৰ ।
উল্লেখযোগ্য যে, যোৱা বৃহস্পতিবাৰে নগাঁৱৰ পৰা আই পি এছ বিষয়া আনন্দ মিশ্ৰ বদলি হৈ যোৱাৰ পিছৰে পৰা অবিৰতভাৱে অপৰাধ বিৰোধী অভিযান অব্যাহত ৰাখিছে নগাঁও আৰক্ষীয়ে । অতিৰিক্ত আৰক্ষী অধীক্ষক ধ্ৰুৱ বৰাই নেতৃত্ব দিয়া নগাঁও আৰক্ষীয়ে বিগত কেইদিনত অপৰাধীৰ বিৰুদ্ধে লাভ কৰিবলৈ সক্ষম হৈছে বহুকেইটা সফলতা । একপ্ৰকাৰ অপৰাধীৰ ৰম্যভূমিত পৰিণত নগাঁৱক অপৰাধমুক্ত কৰিবলৈ অবিৰত অভিযান অব্যাহত ৰখা আনন্দ মিশ্ৰবিহীন নগাঁও আৰক্ষী কিমান সফল হয়, সেয়া সময়তহে লক্ষণীয় হ'ব ।
লগতে পঢ়ক: নগাঁও আৰক্ষীয়ে পুনৰ চলালে গুলী : আৰক্ষী অধীক্ষক ধ্ৰুৱ বৰাই জনালে কাৰণ
