লখিমপুৰ, 13 ছেপ্তেম্বৰ : নিমাতীঘাটৰ শোকাৱহ ফেৰী দুৰ্ঘটনাৰ(Ferry Accident) পাচতো অসুৰক্ষিতভাৱে চলি আছে ৰাজ্যৰ ফেৰী সেৱা(Ferry Service)সমূহ ৷ লখিমপুৰৰ ঘাগৰ ঘাটত(Ghagar Ghat) দেওবাৰে পৰিলক্ষিত হৈছে এই দৃশ্য ৷ ঘাগৰ ঘূনাসুঁতি ফেৰী সেৱাত এতিয়াও এনে বিপজ্জনক ব্যৱস্থা বাহাল আছে ৷
ফেৰীখনত 100 গৰাকী যাত্ৰীৰ বিপৰীতে আছে 12 টা মানহে লাইফ জেকেট । টিকটৰো নাই সু-ব্যৱস্থা । আনকি দুৰ্ঘটনাত পতিত হ’লে উদ্ধাৰৰ বাবে নাই কোনো সহায়কাৰী নাৱৰ ব্যৱস্থা । পাৰ ঘাটটোত এতিয়াও এনেদৰেই চলি আছে ফেৰী সেৱা । এই দৃশ্য প্ৰত্যক্ষ কৰি ক্ষোভ প্ৰকাশ কৰিছে বিভিন্ন দল-সংগঠনৰ লগতে কৈৱৰ্ত যুৱ ছাত্ৰ সন্মিলনীয়ে ৷
লগতে পঢ়ক: যাত্ৰীবাহী ভূটভূটি আৰু ফেৰী চলাচলত প্ৰশাসনৰ ১৪৪ ধাৰা বলৱৎ
দেওবাৰে সন্মিলনীৰ এটা দলে ঘূনাসুঁতিৰ ফেৰী সেৱা ব্যবস্থা পৰিদৰ্শন কৰি যাত্ৰীৰ জীৱন সম্পত্তিক লৈ হেতালি নেখেলিবলৈ প্ৰশাসনক দাবী উত্থাপন কৰে ৷ লগতে এই ফেৰী সেৱা ব্যৱস্থা উন্নত কৰি তুলিবলৈ আহ্বান জনায় ৷
নিমাতীঘাটৰ শোকাৱহ ফেৰী দুৰ্ঘটনাই ৰাজ্যৰ লগতে দেশজুৰি সৃষ্টি কৰিছে উদ্বিগ্নতা ৷ ঘটনাৰ পাচতে চৰকাৰে জল পৰিবহন ব্যৱস্থা সম্পূর্ণৰূপে সুৰক্ষিত কৰাৰ নিৰ্দেশনা জাৰি কৰে ৷ কিন্তু তেনে সময়তো একাংশ ঘাটত এতিয়াও অসুৰক্ষিতভাৱে চলি আছে ফেৰীসেৱা । ইয়াকে লৈ শংকিত হৈ পৰিছে সচেতন ৰাইজ ৷
