কোকৰাঝাৰ,27 আগষ্ট: কোকৰাঝাৰ শাখা ইউকো বেংকত ব্যাপক জালিয়াতিৰ ঘটনা ৷ এজন ব্যক্তিয়ে আন এজন ব্যক্তিৰ বেংক একাউন্ট ব্যৱহাৰ কৰি জালিয়াতিৰে গোপনে ঋণ লোৱাৰ অভিযোগ ভুক্তভোগীৰ ৷ ঘটনাৰ বিৱৰণী অনুসৰি ভুক্তভোগী বেংক একাউন্টৰ গৰাকী কমল মণ্ডলে 2017 চনৰ 20 ফেব্ৰুৱাৰীত শাখাটোত এটা বেংক একাউন্ট খুলি টকা পইচাৰ লেনদেন চলাই আহিছে ৷ কিন্তু শেহতীয়াকৈ ব্যক্তিজনৰ একাউন্টৰ পৰা পূৰ্বৰ ঋণৰ বাবদ কৰ্তন কৰা হৈছে 35 হাজাৰ টকা ৷ কিন্তু অতি আশ্বৰ্যজনক কথাটো হ'ল, সেই বেংকৰ পৰা কামাল মণ্ডলে কেতিয়াও ঋণ লোৱা নাই বুলি মন্তব্য কৰি এইয়া জালিয়াতি বুলি অভিযোগ তুলি কোকৰাঝাৰ সদৰ থানাত এজাহাৰ দাখিল কৰিছে ৷
উল্লেখ্য যে বেংকৰ তথ্য অনুসৰি কামাল মণ্ডলৰ নামত উক্ত একাউন্ট নম্বৰৰ পৰা 2014 চনতে 25 হাজাৰ টকা ঋণ লোৱা হৈছিল ৷ সেইয়া সুতে-মূলে মিলি এতিয়া ৩৫ হাজাৰ টকা হয় ৷ গতিকে বেংকটোৰ বৰ্তমানৰ প্ৰৱন্ধকে কামাল মণ্ডলৰ একাউন্ট নম্বৰ-০৪৯৫০১১০১০৮১৩ ৰ পৰা উক্ত টকা আদায় কৰি লৈছে ৷ আৰু ইয়াৰ পাছতেই পোহৰলৈ আহিছে ব্যক্তিজনৰ লগত সংঘটিত হোৱা ব্যাপক জালিয়াতিৰ ঘটনা ৷ আচলতে 2014 চনত তেতিয়াৰ প্ৰৱন্ধকৰ লগত মিলি উক্ত একাউন্ট নম্বৰত কামাল মণ্ডলৰ নামত একাউন্ট খুলি ঋণ লৈছিল শুকুৰ আলী নামৰ এজন ব্যক্তিয়ে ৷ এতিয়া দুৰ্ভগীয়া কামালৰ প্ৰশ্ন যে, তেওঁৰ অজ্ঞাতে কেনেকৈ সংঘটিত হল এই ঘটনা? কেনেকৈ তেঁওৰ একাউন্ট নম্বৰৰ সৈতে শুকুৰ আলী আকন্দৰক একাউন্ট নম্বৰ একে হ’ল ? নে বেংকৰ কোনো বিষয়া এই জালিয়াতিৰে জড়িত ? ঘটনাৰ উচিত তদন্ত বিচাৰি ইতিমধ্যেই আৰক্ষীৰ কাষ চাপিছে কামাল মণ্ডল ৷
