কোকৰাঝাৰ,14 মাৰ্চঃ দিনে-ৰাতি নিৰ্বাচনী প্ৰচাৰ তুংগত বড়োভূমিত । যিমানে বিটিচি পৰিষদীয় নিৰ্বাচন চমু চাপি আহিছে নিৰ্বাচনী প্ৰচাৰ অব্যাহত ৰাখিছে বিভিন্ন ৰাজনৈতিক দলে । লগতে বিভিন্ন দল-সংগঠনৰ নেতাই নিজ দল ত্যাগ কৰি অন্য দলত যোগদান কৰা দেখিবলৈ পোৱা গৈছে ৷ শনিবাৰে সদৌ অসম সান্থালী ছাত্ৰ সন্থাৰ উপদেষ্টা ৱেলচোন হাসদাৰ লগতে আন তিনিগৰাকী সান্থালী নেতায়ে ইউপিপিএলত যোগদান কৰে ।
আনহাতে, কোকৰাঝাৰৰ তিতাগুৰিৰ পৰা ৰাজমেলা পথাৰলৈ ইউপিপিএলে বাহিৰ কৰা বৃহৎ ৰেলীত ভাগ লৈ আনুষ্ঠানিকভাৱে দলটোত যোগদান কৰে সান্থালী ছাত্ৰ সন্থাৰ উপদেষ্টা ৱেলচোন হাসদাই । ইউপিপিএল-ৰ সভাপতি প্ৰমোদ বড়ো, ইউ জি ব্ৰহ্মকে ধৰি বিভিন্ন নেতায়ে অংশগ্ৰহণ কৰা এই বৃহৎ নিৰ্বাচনী সমদল কোকৰাঝাৰ চহৰৰ জে দি ৰোড হৈ আৰ এন বি ৰোডৰ ৰাজমেলা পথাৰত অন্ত পৰে ।
ইফালে, বিটিচিৰ শাসকীয় দল বিপিএফে 13টা সমষ্টিত প্ৰাৰ্থী তালিকা ঘোষণা কৰে । বৰ্তমানলৈ বিপিএফে 40টা সমষ্টিৰ ভিতৰত 31টা সমষ্টিৰ প্ৰাৰ্থী তালিকা ঘোষণা কৰিছে ।
লগতে চাওকঃবিটিচি নিৰ্বাচনঃ ২৮ নং গৈয়বাৰী পৰিষদীয় সমষ্টিৰ সাম্ভাব্য প্ৰাৰ্থী প্ৰাক্তন বিধায়ক চণ্ডী বসুমতাৰী
