ডিফু, ১৭ এপ্ৰিল: হাতী-মানুহৰ সংঘাত অব্যাহত আছে পশ্চিম কাৰবি আংলঙ জিলাত ৷ প্ৰাপ্ত তথ্য অনুসৰি, পশ্চিম কাৰ্বি আংলং জিলাৰ কলঙা অঞ্চলত এজাক বনৰীয়া হাতীৰ উপদ্ৰৱে অঞ্চলটোত এক প্ৰকাৰ ত্ৰাসৰ সৃষ্টি কৰিছে ৷
জিলাখনৰ ডংকামোকামস্থিত বন উপ সংমণ্ডলৰ অধীনস্থ ইংলং বিৰিক গাঁওখনত শুক্ৰবাৰে নিশা ভাগত অহা এজাক বনৰীয়া হাতীৰ জাকটোৱে তাণ্ডৱ চলাই প্ৰায় ১৫টাকৈ বাসগৃহ কম-বেছি পৰিমাণে ক্ষতি সাধন কৰাৰ লগতে গৃহস্থৰ ভঁৰাল ভাঙি বনৰীয়া হাতীৰ জাকটোৱে ধান খাই ঘৰ-বাৰি তহিলং কৰে ৷
ইপিনে, বনৰীয়া হাতীৰ জাকটোৱে ইংলং বিৰিক গাঁও খনত প্ৰৱেশ কৰি ওৰে নিশাটোত এক প্ৰকাৰে উপদ্ৰৱ চলায় ত্ৰাসৰ সৃষ্টি কৰে ৷ ইফালে শনিবাৰে পুৱতি নিশাই বনৰীয়া হাতীৰ জাকটোৱে গাঁও খনক এৰি কাষতে থকা পাহাৰৰ ফালে প্ৰস্থান কৰে ৷
আনহাতে, ক্ষতিগ্ৰস্ত দৰিদ্ৰ পৰিয়াল কেইটাই চৰকাৰৰ পৰা যথোচিত সাহায্যৰ বাবে দাবী উত্থাপন কৰে ৷ ইয়াৰোপৰি স্থানীয় ৰাইজে হাতী-মানুহৰ সংঘাত পৰা পৰিত্ৰাণ পাবলৈ এক স্থায়ী সমাধান বিচাৰিছে বিভাগীয় কতৃপক্ষ ফালৰ পৰা ৷
লগতে পঢ়ক: মাস্ক পৰিধান নকৰিলে এহাজাৰ টকাৰ জৰিমনা
