ডিফু, ২০ ছেপ্তেম্বৰ : অসমক এখন ড্ৰাগছমুক্ত ৰাজ্য হিচাপে গঢ়াৰ লক্ষ্য লৈ ড্ৰাগছৰ বিৰুদ্ধে জিহাদ্ ঘোষণা কৰা অসম আৰক্ষীৰ হাতলৈ আহিল আন এক সফলতা ৷ দেওবাৰে পুৱাৰ ভাগত কাৰ্বি আংলঙৰ বোকাজানত 3.5 কোটি টকাৰ ড্ৰাগছ জব্দ কৰা হয় ৷ প্ৰাপ্ত খবৰ অনুসৰি কাৰ্বি আংলঙৰ বোকাজান মহকুমাৰ আৰক্ষীয়ে লাহৰিজানত চলোৱা তালাচী অভিযানত 412 গ্ৰাম হেৰ'ইন জব্দ কৰে ।
জানিব পৰা মতে, জব্দ কৰা ড্ৰাগছখিনি ৩০ টা চাবোনৰ বাকচত কঢ়িয়াই অনা হৈছিল । মণিপুৰৰ পৰা গুৱাহাটীলৈ নি থকা অৱস্থাতে এখন বলেৰ'ৰ পৰা জব্দ কৰা হয় এই ড্ৰাগছখিনি । জব্দ কৰা বলেৰ' খনৰ নম্বৰ হৈছে MN 01 AK 4789 ৷ মন কৰিব লগীয়া বিষয় যে, সৰবৰাহকাৰীয়ে অতি কৌশলেৰে গাড়ীৰ লাইটৰ ভিতৰত ভৰাই আনিছিল এই ড্ৰাগছখিনি । অৱশ্যে, আৰক্ষীৰ হাতত বিফল হৈছিল এই কৌশল ৷
এই সন্দৰ্ভত আৰক্ষীয়ে আমজাদ আলি আৰু চায়ড আনিচ খান নামৰ লোক দুজনক আটক কৰিছে । দুয়োজন সৰবৰাহকাৰী লোকৰে ঘৰ মণিপুৰত বুলি জানিবলৈ দিছে আৰক্ষীয়ে । ইফালে, জব্দ কৰা ড্ৰাগছখিনিৰ আন্তঃৰাষ্ট্ৰীয় বজাৰ মূল্য প্ৰায় চাৰে তিনিকোটি টকা হ’ব বুলি জানিব পৰা গৈছে ৷
লগতে পঢ়ক : শিৱসাগৰত PubG খেলি হেৰুৱালে 19 লাখ টকা
