ৰঙিয়া, 26 ডিচেম্বৰ : ৰঙিয়াত এইবাৰ ৰাইজৰ ৰোষত পৰিল মোবাইল চোৰ ৷ ঘটনা অনুসৰি, ৰঙিয়াৰ এন টি ৰোডত থকা ঈদগাহ ময়দানৰ সমীপৰ এখন দোকানত কোনো নথকা অৱস্থাত প্ৰৱেশ কৰি মোবাইল চুৰি কৰিবলৈ চেষ্টা চলায় চোৰটোৱে । তেনে সময়তে দোকানখনত গৰাকী উপস্থিত হোৱাত চোৰটো পলাবলৈ চেষ্টা কৰে ৷ কিন্তু দোকানখনৰ মালিকে চোৰটোক আবদ্ধ কৰি ৰাখিবলৈ সক্ষম হয় ।
পৰৱৰ্তী সময়ত ঘটনাস্থলীত উপস্থিত হয় স্থানীয় ৰাইজ । উপস্থিত ৰাইজে চোৰটোক বিদ্যুতৰ খুঁটাত বান্ধি ৰাখে ৷ পৰৱৰ্তী সময়ত চোৰটোক ৰাইজে আৰক্ষীক গতাই দিয়ে ৷ ধৃত চোৰটো ৰঙিয়াৰ খৈৰাবাৰীৰ জিতুমণি কলিতা বুলি জানিব পৰা গৈছে ৷ আনহাতে স্থানীয় ৰাইজে তালাচী চলোৱাত ড্ৰাগছ সেৱনত ব্যৱহাৰ কৰা চিৰিঞ্জ উদ্ধাৰ কৰে চোৰটোৰ জেপৰ পৰা ৷
ঘটনাৰ সন্দৰ্ভত ৰাইজে কয় যে, চোৰটো ড্ৰাগছ আসক্ত আছিল ৷ পূৰ্বেও কেইবাটাও মোবাইল চুৰি কৰিছিল চোৰটোৱে ৷ ড্ৰাগছ সেৱনৰ বাবে প্ৰয়োজনীয় ধনৰ বাবে চোৰটোৱে মোবাইল চুৰি কাৰ্য কৰি আহিছে বুলি ৰাইজে অভিযোগ কৰে ৷ দীৰ্ঘদিন ধৰি ঈদগাহ ময়দানৰ সমীপত থকা দোকানবোৰৰ গৰাকীৰ পৰা চোৰটোৱে মোবাইল চুৰি কৰি আহিছিল ৷ চোৰৰ পৰা অতিষ্ঠ হৈ ৰাইজে আৰক্ষীক অৱগত কৰিছিল যদিও আৰক্ষীয়েও আটক কৰিব পৰা নাছিল চোৰটোক ৷ কিন্তু সোমবাৰে চোৰটোক হাতে-লোটে কৰায়ত্ত কৰে ৰাইজে ৷
আনহাতে ৰাইজৰ অভিযোগ অনুসৰি, উক্ত অঞ্চলত বৃদ্ধি পাইছে ড্ৰাগছ সেৱনকাৰী যুৱকৰ সংখ্যা ৷ যাৰ বাবে চোৰৰ উপদ্ৰৱ বৃদ্ধি পাইছে ৷ আৰক্ষীয়ে বিভিন্ন সময়ত ড্ৰাগছ বিৰোধী অভিযান চলাই আহিছে যদিও বৰ্তমানেও ৰঙিয়াত ড্ৰাগছৰ বেহা অব্যাহত আছে বুলি ৰাইজে অভিযোগ কৰে ৷
লগতে পঢ়ক : কেবল সন্দেহৰ ওপৰতেই ৰাজ্যত চলিছে নেকি এনকাউণ্টাৰ ?
