বাইহাটা চাৰিআলি, 9 নৱেম্বৰঃ লকডাউনৰ সময়ছোৱাত ক্ষতিগ্ৰস্ত হোৱা অসমৰ সংবাদ মাধ্যমলৈ চৰকাৰে বিশেষ অৰ্থনৈতিক পেকেজ ঘোষণা কৰাৰ দাবী জনালে সদৌ অসম ছাত্ৰ সন্থাৰ মুখ্য উপদেষ্টা সমুজ্জ্বল কুমাৰ ভট্টাচাৰ্যই ৷ কামৰূপৰ বাইহাটা চাৰিআলিত সোমবাৰে সম্বোধন কৰা এক সংবাদমেলত ভট্টাচাৰ্যই এই দাবী তুলে ৷
সংবাদমেলত অসম উন্নতি সভাক শক্তিশালী ৰূপত গঢ় দি ৰাজ্যত অৰ্থনৈতিক বিপ্লৱ সূচনা কৰাৰ পৰিকল্পনা কথাও প্ৰকাশ কৰিলে জেষ্ঠ ছাত্ৰ নেতাগৰাকীয়ে । সমুজ্জ্বল কুমাৰ ভট্টাচাৰ্যই কয় যে, অৰ্থনৈতিক বিকাশৰ বাবে কৃষিকে ধৰি বিভিন্ন ক্ষেত্ৰত সংগঠিতভাৱে কাম কৰিব লাগিব । তদুপৰি, সংবাদ মেলখনত অসংগঠিতভাৱে ৰাজ্যত আৰম্ভ হোৱা অৰ্থনৈতিক বিপ্লৱক সংগঠিত ৰূপত আগবঢ়াই নিয়াৰ পৰিকল্পনাৰ কথাও সদৰি কৰে ভট্টাচাৰ্যই ৷
ইফালে লকডাউনৰ বাবে ক্ষতিগ্ৰস্ত লোকসকলৰ সকলো ধৰণৰ ঋণৰ সুত ৰেহাই দিয়াৰো দাবী সমুজ্জ্বল কুমাৰ ভট্টাচাৰ্যৰ। সমান্তৰালভাৱে মূল্যবৃদ্ধিৰ প্ৰসংগ উত্থাপন কৰি চৰকাৰৰ ব্যৰ্থতাৰ তালিকা দীঘলীয়া বুলি মন্তব্য প্ৰকাশ কৰে সমুজ্জ্বল কুমাৰ ভট্টাচাৰ্যই ৷
লগতে পঢ়কঃসদৌ বিটিএডি নাথ-যোগী সন্মিলনীৰ শপত গ্ৰহণ
