গুৱাহাটী, ২১ অক্টোবৰ : গুৱাহাটীৰ নুনমাটিত চুৰি বেটাৰীসহ দুই গভাইত চোৰক আটক কৰে আৰক্ষীয়ে । নুনমাটি আৰক্ষী থানাৰ অন্তৰ্গত আনন্দ নগৰত আৰক্ষীয়ে অভিযান চলাই চোৰ দুটাক আটক কৰে ৷ ধৃত চোৰ দুটা নুনমাটি আনন্দ নগৰৰ ৰাজ ৰছেলি(২৮) আৰু ৰাজু আহমেদ(২৮) । আৰক্ষীয়ে চোৰ দুটাৰ পৰা চুৰি বেটাৰীও জব্দ কৰে ।
আৰক্ষীৰ সূত্ৰৰ পৰা জানিব পৰা মতে, নুনমাটিৰ আনন্দ নগৰত বাবুল আলী নামৰ লোকজনে এএছ ১৫ এচি ০৫৩৭ নম্বৰৰ গাড়ীখন পাৰ্কিং কৰি ৰাখিছিল । উক্ত স্থানৰ পৰাই গাড়ীখনৰ বেটাৰী চুৰি কৰি নিছিল ৰাজ ৰছেলি আৰু ৰাজু আহমেদে ৷ বুধবাৰে পুৱা বাবুল আলীয়ে গাড়ীখন ষ্টাৰ্ট দিবলৈ লওতেহে চুৰিকাণ্ডৰ কথা পোহৰলৈ আহে ।
পিছত গাড়ীখনৰ ওচৰত থকা চিচিটিভিৰ ফুটেজ চাই ৰাজ নামৰ চোৰটোক চিনাক্ত কৰি আৰক্ষীক খবৰ দিয়ে । আৰক্ষীয়ে ৰাজ ৰছেলিক আটক কৰে । নুনমাটি আৰক্ষীয়ে ৰাজক আটক কৰাৰ পাচত তেওঁক লগত লৈ FCI গেটৰ সমীপৰ পৰা চুৰি বেটাৰীটো উদ্ধাৰ কৰে । তদুপৰি ঘটনাত জড়িত ৰাজু আহমেদ নামৰ আনগৰাকী লোককো আটক কৰে । নুনমাটি আৰক্ষীয়ে ভাৰতীয় দণ্ডবিধি আইনৰ ৩৭৯/৪১১ ধাৰাৰ অধীনত এটা গোচৰ ৰুজু কৰি তদন্ত অব্যাহত ৰাখিছে ৷
লগতে পঢ়ক: ATMৰ পৰা ধন হৰলুকিৰ অভিযোগত পাঁচজনক আটক বৰহোলা আৰক্ষীৰ
