গুৱাহাটী,১৫ এপ্ৰিলঃ ক'ভিডৰ সংক্ৰমণ ক্ৰমাৎ বৃদ্ধি পোৱাত বহিঃৰাজ্যৰ পৰা অসমলৈ অহা ৰে'ল যাত্রীৰ ক্ষেত্রত উত্তৰ-পূব সীমান্ত ৰে'লৱেৰ লগতে অসম চৰকাৰে বিশেষ ব্যৱস্থা গ্ৰহণ কৰিছে । ৰে'ল কৰ্তৃপক্ষই জনোৱা মতে, এতিয়ালৈ কোনো ৰে'ল বাতিল কৰাৰ সিদ্ধান্ত লোৱা নাই । ৰাইজক আতংকিত নহ'বলৈ আহ্বান জনাই ৰে'ল কৰ্তৃপক্ষই উৰা বাতৰিত বিশ্বাস নকৰিবলৈ অনুৰোধ জনাইছে । বৰ্তমান উত্তৰ-পূৱ সীমান্ত ৰে'লৱেৰ অধীনত ৮০ খন ৰে'ল চলি আছে আৰু ইয়াৰে ২৭ খন স্থানীয় যাত্ৰীবাহী ৰে'ল । ৰে'লৱে ষ্টেচনত সামাজিক দূৰত্ব মানি চলা, ছেনিটাইজাৰৰ ব্যৱহাৰ তথা মাস্ক পৰিধান কৰাটো বাধ্যতামূলক কৰা হৈছে । ৰে'ল ষ্টেচনত ক'ভিডৰ প্ৰতি লক্ষ্য ৰাখি প্ৰয়োজনীয় সকলো সতৰ্কতামূলক ব্যৱস্থা অৱলম্বন কৰা হৈছে । ইফালে ৰাজ্য চৰকাৰৰ তৰফৰ পৰা ষ্টেচনসমূহত ক'ভিড টেষ্টৰ ব্যৱস্থা কৰা হৈছে ।
বিশেষকৈ অসমৰ বাহিৰৰ পৰা অহা প্ৰতিগৰাকী যাত্রীৰ ক'ভিড টেষ্ট বাধ্যতামূলক কৰা হৈছে । ৰাজ্যৰ ভিতৰত চলাচল কৰা স্থানীয় ৰে'লৰ যাত্রীৰ ক্ষেত্রত ক'ভিড টেষ্ট বাধ্যতামূলক কৰা হোৱা নাই । লক্ষণীয় বিষয় যে, গুৱাহাটীত কৰ’ণাৰ সংক্ৰমণ দ্ৰুতগতিত বৃদ্ধি পাব ধৰিছে । ইফালে ক'ভিড টেষ্ট বাধ্যতামূলক কৰাৰ পৰা পল্টনবজাৰ ৰে'ল ষ্টেচনত দৈনিক বহু লোকৰ দেহত ক'ভিডৰ উপস্থিতি ধৰা পৰিছে । বুধবাৰে পাঁচজন লোকৰ দেহত ক'ভিডৰ উপস্থিতি ধৰা পৰে । পল্টনবজাৰ ৰে'ল ষ্টেচনত ক'ভিড টেষ্টৰ দায়িত্বত থকা স্বাস্থ্য বিভাগৰ দেৱ শইকীয়াই জনোৱা মতে ষ্টেচনটোত দৈনিক সহস্ৰাধিক লোকৰ ক'ভিড পৰীক্ষা কৰা হয় । বাহিৰৰ পৰা অহা প্ৰতিগৰাকী যাত্রীৰ ক'ভিড পৰীক্ষা কৰা হয় । দৈনিক প্ৰায় ৭-৮ খন ৰে'ল বহিঃৰাজ্যৰ পৰা ষ্টেচনটোলৈ আহে আৰু পৰীক্ষাত দৈনিক বহু লোকৰ শৰীৰত ক'ভিডৰ উপস্থিতি পোৱা গৈছে বুলি শইকীয়াই জানিবলৈ দিয়ে ।
আনহাতে, প্ৰশাসনৰ ফালৰ পৰা দায়িত্বত থকা ভাস্কৰ ভট্টাচাৰ্যই জনোৱা মতে, ক'ভিড চিনাক্ত হোৱা যাত্রীসকলক চিকিৎসালয়লৈ প্ৰেৰণৰ ব্যৱস্থা প্ৰশাসনৰ ফালৰ পৰা কৰি থকা হৈছে । হোম কোৱাৰেণ্টাইনত থাকিব বিচৰাসকলৰ ক্ষেত্রত যাৱতীয় দিশ চালি-জাৰি চাই সেইধৰণে ব্যৱস্থা কৰা হয় । উল্লেখ্য যে, ক'ভিডৰ সংক্ৰমণ ভয়াৱহ হাৰত বৃদ্ধি পালে ৰে'ল চলাচলৰ সংখ্যা হ্ৰাস হোৱাৰ সম্ভাৱনা নুই কৰিব নোৱাৰি । বিগত ২৪ ঘণ্টাত অসমত ৩৮৫ গৰাকী লোক নতুনকৈ ক'ভিডত আক্ৰান্ত হৈছে আৰু ইয়াৰে ২১০ গৰাকী কামৰূপ মহানগৰ জিলাৰ ।
