গুৱাহাটী, 7 মে' : বিশিষ্ট সংগীত শিল্পী ঋষিৰাজ শৰ্মা আৰু নাই । স্বনামধন্য শিল্পী প্ৰয়াত দিলীপ শৰ্মা আৰু শিল্পী সুদক্ষিণা শৰ্মাৰ পুত্ৰ ঋষিৰাজ শৰ্মাই দেওবাৰে চিকিৎসাধীন অৱস্থাতে শেষ নিশ্বাস ত্যাগ কৰে । দীৰ্ঘদিন ধৰি শিল্পীগৰাকী অসুস্থ হৈ আছিল । বৃক্কৰ ৰোগত আক্ৰান্ত হৈ গুৱাহাটী চিকিৎসা মহাবিদ্যালয় হাস্পতালত চিকিৎসাধীন হৈ থকা ঋষিৰাজ শৰ্মাই অৱশেষত দেওবাৰে দিনৰ 11.25 বজাত শেষ নিশ্বাস ত্যাগ কৰে । মৃত্যুৰ সময়ত তেওঁৰ বয়স আছিল 56 বছৰ (Guwahati medical college and hospital)।
গুৱাহাটীৰ দক্ষিণ শৰণীয়াৰ নিবাসী ঋষিৰাজ শৰ্মাই জন্মসূত্রেই লাভ কৰিছিল সাংস্কৃতিক পৰিৱেশ । তেওঁৰ ঘৰখন আছিল সংগীতৰ সাধনাক্ষেত্র । পিতৃ গণশিল্পী দিলীপ শৰ্মা আৰু মাতৃ বিশিষ্ট শিল্পী সুদক্ষিণা শৰ্মাৰ পৰা তেওঁ লাভ কৰিছিল সংগীতৰ আদিপাঠ । সান্নিধ্য লাভ কৰিছিল মোমায়েক সুধাকণ্ঠ ভূপেন হাজৰিকাৰ । সেই সূত্রে তেওঁ সহজতেই সাংস্কৃতিক ক্ষেত্রখনলৈ ধাৱমান হৈছিল । সংগীত সাধনা কৰাৰ লগতে তেওঁ গুৱাহাটী উচ্চ ন্যায়ালয়ৰ অধিবক্তা হিচাপেও কৰ্মৰত হৈ আছিল (Singer Bhupen Hazarika)।
মাতৃ সুদক্ষিণা শৰ্মাৰ সৈতে বহু অনুষ্ঠানত গীত পৰিৱেশন কৰিছিল । বিভিন্ন অনুষ্ঠানত তেওঁ মাতৃৰ সৈতে কণ্ঠ নিৰ্গত কৰিছিল । মাতৃৰ সৈতে তেওঁক প্ৰায়ে বাদ্যসংগত কৰা দেখা গৈছিল । কণ্ঠশিল্পীৰ উপৰি মিউজিচিয়ান আৰু কবি হিচাপে তেওঁৰ আছিল বিশেষ সুনাম । উল্লেখ্য যে, 2021 চনৰ মে' মাহত ক'ভিডত আক্ৰান্ত হৈ তেওঁ যথেষ্ট জটিলতা পৰিস্থিতিৰ সন্মূখীন হৈছিল (Noted singer Rishiraj Sharma passes away) ।
উল্লেখযোগ্য যে, শিল্পীগৰাকীৰ অকাল বিয়োগত ৰাজ্যৰ সাংস্কৃতিক মহলত শোকৰ ছাঁ পৰিছে । সংগীত শিল্পী ঋষিৰাজ শৰ্মাৰ অকাল বিয়োগত মুখ্যমন্ত্রী হিমন্ত বিশ্ব শৰ্মাই গভীৰ শোক প্ৰকাশ কৰিছে । শোকবাৰ্তাত মুখ্যমন্ত্রীগৰাকীয়ে অসমৰ সংগীত জগতৰ অতি চিনাকি নাম তথা অমায়িক ব্যক্তিত্বৰ ঋষিৰাজ শৰ্মাৰ বিয়োগ ৰাজ্যৰ বাবে বৃহৎ ক্ষতি বুলি কয় । মুখ্যমন্ত্রীয়ে এই দুখৰ মুহূৰ্তত তেখেতৰ শোকস্তব্ধ মাতৃ সুদক্ষিণা শৰ্মাৰ লগতে পৰিয়ালবৰ্গৰ প্ৰতি গভীৰ সমবেদনা জ্ঞাপন কৰে । শিল্পীগৰাকীৰ মৃত্যুত ৰাজ্যৰ বিভিন্ন দল-সংগঠন তথা ব্যক্তি বিশেষে গভীৰ শোক প্ৰকাশ কৰিছে (Assam CM Himanta Biswa Sarma) ।
শিল্পীগৰাকীৰ মৃত্যুত ৰাজ্যৰ সাংস্কৃতিক মন্ত্রী বিমল বড়াই শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে । মৃত্যৰ সময়ত শৰ্মাই তেওঁৰ মাতৃ সুদক্ষিণা শৰ্মাৰ লগতে ভালেংখ্যক আত্মীয়-স্বজনক এৰি থৈ গৈছে (Minister Bimal Borah)।
লগতে পঢ়ক : Rebellion in Bongaigaon BJP : বঙাইগাঁও বিজেপিত বিদ্ৰোহ, একেলগে ১৮ নেতাৰ পদত্যাগ
