গুৱাহাটী,১৮ মাৰ্চঃ গুৱাহাটীৰ ৰাজপথত শক্তি প্ৰদৰ্শন কৰি বিশাল ৰেলীৰে বৃহস্পতিবাৰে গুৱাহাটীৰ চাৰিটা সমষ্টিৰ কেইবাগৰাকী হেভীৱেট প্ৰাৰ্থীয়ে মনোনয়ন পত্র দাখিল কৰে । পূৱ গুৱাহাটী সমষ্টিৰ পৰা বিজেপি প্ৰাৰ্থী সিদ্ধাৰ্থ ভট্টাচাৰ্যই আৰু পশ্চিম গুৱাহাটী সমষ্টিৰ পৰা বিজেপিৰ মিত্রজোঁটৰ অগপৰ প্ৰাৰ্থী ৰমেন্দ্ৰ নাৰায়ণ কলিতাই মনোনয়ন পত্র দাখিল কৰে ।
আনহাতে দিছপুৰ সমষ্টিৰ বিজেপি প্ৰাৰ্থী অতুল বৰাই আৰু জালুকবাৰী সমষ্টিৰ কংগ্ৰেছৰ প্ৰাৰ্থী ৰমেন চন্দ্ৰ বৰঠাকুৰে মনোনয়ন দাখিল কৰে । প্ৰাৰ্থীসকলে কামৰূপ মহানগৰ জিলা উপায়ুক্তৰ কাৰ্যালয়ত মনোনয়ন পত্র দাখিল কৰে ।
উল্লেখ যে, মনোনয়ন দাখিল কৰা সময়ত সিদ্ধাৰ্থ ভট্টাচাৰ্যক সংগ দিয়ে মন্ত্ৰী হিমন্ত বিশ্ব শৰ্মাই । মন্ত্ৰী হিমন্ত বিশ্ব শৰ্মাৰ সৈতে চাইকেল চলাই মনোনয়ন দাখিল কৰিবলৈ যোৱা দেখা গ'ল সিদ্ধাৰ্থ ভট্টাচাৰ্যক ৷ উলুবাৰীৰ পৰা সমদল কৰি ভঙাগড়, গুৱাহাটী ক্লাব হৈ জিলা উপায়ুক্তৰ কাৰ্যালয়ত মনোনয়ন পত্র দাখিল কৰে ভট্টাচাৰ্যই ।
আনহাতে দিছপুৰ সমষ্টিৰ বিজেপি প্ৰাৰ্থী অতুল বৰাই বৃহৎ সমদলেৰে পাথৰকুঁৱৰীৰ পৰা ৰেলী উলিয়াই নুনমাটি হৈ চানমাৰীৰে গৈ জিলা উপায়ুক্তৰ কাৰ্যালয়ত মনোনয়ন দাখিল কৰে । সেইদৰে অগপৰ ৰমেন্দ্ৰ নাৰায়ণ কলিতাই বিশাল সমদল কৰি আজি মনোনয়ন দাখিল কৰে । সমান্তৰালভাৱে কংগ্ৰেছৰ জালুকবাৰী সমষ্টিৰ প্ৰাৰ্থী ৰমেন চন্দ্ৰ বৰঠাকুৰে সোণাৰাম হাইস্কুল খেলপথাৰৰ পৰা ৰেলী উলিয়াই জিলা উপায়ুক্তৰ কাৰ্যালয়ত মনোনয়ন দাখিল কৰে ।
উল্লেখ্য যে, প্ৰতিগৰাকী প্ৰাৰ্থীয়ে ৰাজপথত বিশাল ৰেলী উলিয়াই নিজৰ শক্তি প্ৰদৰ্শন কৰাৰ ফলত বৃহস্পতিবাৰৰ দিনটো গুৱাহাটী মহানগৰীৰ ৰাজপথত শ্বাসৰুদ্ধ পৰিৱেশৰ সৃষ্টি হয় । ভয়াবহ যান-জঁটৰ বাবে ঘণ্টাৰ পাছত ঘণ্টা ধৰি হাজাৰ হাজাৰ লোক ৰাজপথতে আৱদ্ধ হৈ ৰয় ।
লগতে পঢ়ক: তুংগত উঠিছে ৰাইজৰ দলৰ প্ৰাৰ্থী নজৰুল ইছলামৰ নিৰ্বাচনী প্ৰচাৰ
