গুৱাহাটী, ২৫ ছেপ্টেম্বৰ : ৰাজ্যৰ আগৰ খেতিয়ক সকলৰ ব্যৱসায়িক লেন-দেন আৰু প্ৰসাৰৰ বাবে গোলাঘাটৰ খুমটাইত আন্তঃৰাষ্ট্ৰীয় আগৰ বাণিজ্য কেন্দ্ৰ স্থাপন কৰাটো ৰাজ্যত ৭ বছৰীয়া বিজেপি চৰকাৰৰ অন্যতম পদক্ষেপ আছিল ৷ কিন্তু আজিও কাৰ্যক্ষম হৈ নুঠিল এই প্ৰকল্প ৷ নিৰ্মীয়মান এই প্ৰকল্পত সোমবাৰে উপস্থিত হয় ৰাজ্যৰ উদ্যোগ,বাণিজ্য আৰু ৰাজহুৱা প্ৰতিষ্ঠান বিভাগৰ মন্ত্ৰী বিমল বড়া ৷
সোমবাৰে গোলাঘাট জিলাৰ খুমটাই সমষ্টিৰ ডাবিডুবিত ১০ কোটি টকা ব্যয় সাপেক্ষে নিৰ্মীয়মান আন্তঃৰাষ্ট্ৰীয় আগৰ বাণিজ্য কেন্দ্ৰ পৰিদৰ্শন কৰাৰ লগতে নিৰ্মাণ কাৰ্যৰ অগ্ৰগতিৰ বুজ লয় মন্ত্ৰী বিমল বড়াই ৷ কেন্দ্ৰটোৰ নিৰ্মাণ কাৰ্যক লৈ অসন্তুষ্টি প্ৰকাশ কৰে মন্ত্ৰীগৰাকীয়ে ৷ স্থানীয় বিধায়ক মৃণাল শইকীয়াৰ সৈতে পৰিদৰ্শন কালত মন্ত্রী বড়াই উদ্যোগ বিভাগৰ বিষয়া সকলৰেও আলোচনাত মিলিত হয় ৷ এই বাণিজ্য কেন্দ্ৰৰ জৰিয়তে অসমৰ সাঁচি খেতিয়কসকলে ব্যৱসায়ৰ ক্ষেত্ৰত সুবিধা লাভ কৰাৰ লগতে উচিত মূল্য পোৱাত সহায়ক হ'ব বুলি আশা প্ৰকাশ কৰা হৈছে ৷
কেন্দ্ৰটোৰ নিৰ্মাণ কাৰ্য ক্ষীপ্ৰতাৰে সম্পূৰ্ণ কৰি তুলিবলৈ বিভাগীয় বিষয়া-কৰ্মচাৰী সকলক মন্ত্রী বড়াই নিৰ্দেশ প্ৰদান কৰে ৷ উল্লেখ্য যে এই কেন্দ্রটোৰ নিৰ্মাণ কাৰ্য 2022 বৰ্ষৰ অক্টোবৰ মাহতে সম্পূৰ্ণ হ'ব লাগিছিল ৷ কিন্তু নিৰ্মাণ কাৰ্য লেহেমীয়া হোৱাত সময়মতে সম্পূৰ্ণ হৈ নুঠিল এই কেন্দ্ৰ ৷ যাক লৈ এতিয়া মন্ত্রী বড়াই অসন্তুষ্টি প্ৰকাশ কৰে ৷ সময় মতে কাম সম্পূর্ণ নহ’লে ইয়াৰ দায়িত্বত থকা বিষয়াগৰাকীক নিলম্বন কৰাৰ বাবেও উৰ্ধতন বিষয়াক নিৰ্দেশ প্ৰদান কৰে মন্ত্ৰীগৰাকীয়ে ৷ মন্ত্রী বিমল বড়াই লগতে ইয়াৰ বাবে এক সময় নিৰূপিত কাৰ্যসূচী প্ৰস্তুত কৰাৰ লগতে অগ্ৰগতি সন্দৰ্ভত প্ৰতিবেদন দাখিল কৰিবলৈ গোলাঘাট জিলাৰ উপায়ুক্ত ড০ প্ৰবীণ উদয়ক নিৰ্দেশ দিয়ে ৷
উল্লেখযোগ্য যে, 2020 চনৰ অক্টোবৰ মাহতে তেতিয়াৰ মুখ্যমন্ত্ৰী সৰ্বানন্দ সোণোৱালে গোলাঘাট জিলাৰ খুমটাই সমষ্টিৰ ডাবিডুবিত, দেশৰ ভিতৰতে প্ৰথম আন্তঃৰাষ্ট্ৰীয় আগৰ বাণিজ্য কেন্দ্ৰৰ আধাৰশিলা স্থাপন কৰিছিল ৷ কৃষকসকলৰ লগতে অসমৰ আগৰ বাগিচা আৰু বাণিজ্যৰ সৈতে জড়িত উদ্যোগীসকলৰ ব্যৱসায়িক সম্ভাৱনাক প্ৰসাৰিত কৰিবলৈ ৰাজ্য চৰকাৰে এই বাণিজ্য কেন্দ্ৰ স্থাপনৰ সিদ্ধান্ত গ্ৰহণ কৰিছিল ৷
লগতে পঢ়ক : MLA Bhuwan Pegu in Jonai:বিধায়ক ভূৱন পেগুৰ জোনাইৰ বিধ্বস্ত বাট-পথ পৰিদৰ্শন
