গুৱাহাটী, ৬ এপ্ৰিল : বিজেপি চৰকাৰৰ শাসনত বিগত ২০১৬ চনৰ এপ্রিল মাহৰ পৰা চলিত ২০২২ চনৰ ২৮ ফেব্ৰুৱাৰীলৈকে অসমত সংঘটিত হৈছে হত্যাকাণ্ডৰ প্ৰায় ৬,১৯২ টা ঘটনা । সেই হিচাপত ৰাজ্যখনত দৈনিক গড়ে তিনিটাকৈ হত্যাকাণ্ডৰ ঘটনা সংঘটিত হয় (Many murders have taken place in Assam)।
উল্লেখ্য যে, উক্ত সময়চোৱাত গুৱাহাটী মহানগৰীত হত্যাকাণ্ডৰ ৪২৫ টা ঘটনা সংঘটিত হৈছে । ইয়াৰ বাদেও উক্ত সময়ছােৱাৰ ভিতৰত ৰাজ্যত চুৰিৰ ৬৩,১১১ টা, ডকাইতিৰ ১০৪৮ টা, ধর্ষণৰ ৯,৬৩৮ টা, অপহৰণৰ ৩৪,২৮৩ টা, বেংক লুটৰ ৭ টা, অন্ধবিশ্বাসৰ ফলত হত্যাৰ ২৯ টা আৰু লুণ্ঠনৰ ৫,৪৪০ টা ঘটনা সংঘটিত হোৱাৰ তথ্য পোহৰলৈ আহিছে । এই তথ্য ৰাজ্যৰ গৃহ বিভাগৰ ।
আনহাতে, গুৱাহাটী মহানগৰীত উক্ত সময়ছােৱাত চুৰিৰ ২৩,৩১১ টা, ডকাইতৰ ৪২টা, ধর্ষণৰ ৩৬৯ টা, অপহৰণৰ ৩,৬৪৮ টা, পকেটমাৰৰ ১১৪ টা আৰু লুণ্ঠনৰ ৩,০৯৫ টা ঘটনা সংঘটিত হৈছিল ।
ইফালে উক্ত সময়ছােৱাত অসমত ১০,৬৫১ টা চাইবাৰ অপৰাধৰ ঘটনা সংঘটিত হােৱাৰ লগতে ১,৩৭৪ জন লােকক গ্রেপ্তাৰ কৰা হৈছে । তথ্য মতে ২০১৭ চনৰ পৰা ২০২১ চনলৈকে ৰাজ্যৰ থানাসমূহত পঞ্জীয়ন হােৱা গােচৰসমূহৰ ভিতৰত ৫,৮৭,৯১৬ টা গােচৰ নিষ্পত্তি কৰাৰ লগতে ৯৫,৯৯৪ টা গােচৰ মীমাংসা হ’বলৈ এতিয়াও বাকী আছে ।
লক্ষণীয় বিষয় যে, ৰাজ্যখনত উদ্বেগজনকভাৱে বৃদ্ধি পাব ধৰিছে বিভিন্ন ধৰণৰ অপৰাধমূলক ঘটনা । ইফালে অপৰাধ আৰু অপৰাধীৰ বিৰুদ্ধে ৰাজ্যজুৰি ব্যাপক অভিযানৰ লগতে অব্যাহত আছে এনকাউণ্টাৰ । কিন্তু তথাপিও নিয়ন্ত্ৰণ হোৱা নাই অপৰাধমূলক কাৰ্যকলাপ ।
লগতে পঢ়ক : চলাহী কথাৰে লুটিলে ধন; ভূপেনক বিচাৰি খঙত জ্বলিছে ভুক্তভোগীৰ মন
