গুৱাহাটী, ২৯ জুন : গুৱাহাটী এৰিলে শিৱসেনাৰ বিদ্ৰোহী বিধায়কসকলে । বুধবাৰে বিয়লি ৫ বজাত গুৱাহাটীৰ ৰেডিশ্বন ব্লু হোটেল এৰিলে মহাৰাষ্ট্ৰৰ ৪৮ জন বিসম্বাদী বিধায়কে(MAHA rebel MLAs left Guwahati) । কটকটীয়া নিৰাপত্তা বেষ্টনীৰ মাজেৰে ৪ খন বাছেৰে ৰেডিশ্বন ব্লু হোটেলৰ পৰা বৰঝাৰ বিমানবন্দৰলৈ ৰাওনা হয় মহাৰাষ্ট্ৰৰ বিসম্বাদী শিবিৰ । গুৱাহাটীৰ পৰা পোনে পোনে গোৱালৈ যাব বিসম্বাদী বিধায়কসকল (MAHA MLAs to fly for GOA) ।
বিসম্বাদী বিধায়কসকলক বৰঝাৰলৈ সংগ দিয়ে অসমৰ মন্ত্ৰী, সাংসদ আৰু বিধায়কে । মন্ত্ৰী পীযুষ হাজৰিকা, অশোক সিংঘাল, সাংসদ পল্লৱ লোচন দাস আৰু বিধায়ক দিগন্ত কলিতাই বিসম্বাদী বিধায়কসকলক বিমানবন্দৰলৈ আগবঢ়াই লৈ যায় । গোৱালৈ যোৱাৰ পৰিপ্ৰেক্ষিতত বৰঝাৰ বিমানবন্দৰত কটকটীয়া নিৰাপত্তা বেষ্টনী গঢ়ি তোলা হৈছে ।
৬ বজাত আটাইকেইজন বিধায়কে উৰা মাৰিব গোৱালৈ । গোৱাৰ হোটেল তাজত বুকিং কৰা হৈছে ৭১ টা কোঠা । বৰঝাৰ বিমানবন্দৰত বিশাল আৰক্ষী বাহিনী মোতায়েন কৰাৰ লগতে বান্ধি দিয়া হৈছে বেৰিকেড ।
উল্লেখ্য যে, যোৱা বুধবাৰৰ পৰা মহাৰাষ্ট্ৰৰ শিৱসেনাৰ বিদ্ৰোহী নেতা একনাথ সিন্দেৰ নেতৃত্বত বিধায়কসকলে গুৱাহাটীৰ ৰেডিশ্বন ব্লুত বাহৰ পাতে । এই সময়ছোৱাত মহাৰাষ্ট্ৰৰ ৰাজনীতিক লৈ যথেষ্ট চৰ্চা চলে সমগ্ৰ দেশত ৷ প্ৰথমে 40 জন বিধায়ক আহে গুৱাহাটীলৈ ৷ পৰৱৰ্তী সময়ত এই সংখ্যা হয়গৈ 48 গৰাকী ৷
ইতিমধ্যে মহাৰাষ্ট্ৰ বিধানসভাৰ শাসকীয় দলৰ 39 গৰাকী আৰু নিৰ্দলীয় 9 গৰাকী বিধায়কে বিৰুদ্ধাচাৰণ কৰে ঠাকৰে চৰকাৰৰ ৷ লগে লগে থৰক বৰক হৈ পৰিছে মহাৰাষ্ট্ৰ চৰকাৰ ৷ মঙলবাৰে বিজেপি নেতা তথা প্ৰাক্তন মুখ্যমন্ত্ৰী দেৱেন্দ্ৰ ফাডনাভিছে ৰাজ্যপালক সাক্ষাৎ কৰি অতি শীঘ্ৰে বিধানসভাৰ শক্তি পৰীক্ষা অনুষ্ঠিত কৰাৰ বাবেও আহ্বান জনায় ৷
মুম্বাইৰ পৰিৱৰৰ্তে গোৱালৈ যোৱা বিধায়কসকলে নতুনকৈ কি ৰণনীতি গ্ৰহণ কৰে সেয়াও লক্ষ্যনীয় হ’ব ৷ কিয়নো ইতিমধ্যে সঞ্জয় ৰাউটে দিয়া প্ৰস্তাৱ অগ্ৰাহ্য কৰি নিজৰ স্থিতিত অটল হৈ আছে একনাথ সিন্দে ৷
লগতে পঢ়ক : কামাখ্যা মন্দিৰত মহাৰাষ্ট্ৰৰ বিসম্বাদী বিধায়কৰ পূজা অৰ্চনা
