গুৱাহাটী, ২৭ মাৰ্চ : ৰাজ্যৰ চৌদিশে এতিয়া তুংগত উঠিছে ৰঙালীক আদৰাৰ প্ৰস্তুতি (Bihu preparation in Assam) । বাপটিসাহোন ৰঙালী বিহুটি উদযাপনৰ বাবে প্ৰতিজন অসমীয়াৰে ব্যস্ততাৰ সীমা নাই । বিহুৰ প্ৰস্তুতিৰ সমানে আয়োজন কৰা হৈছে বিহু নাচ, বিহু গীত তথা ঢোলবাদনৰ আখৰা ৷ বাদ পৰি ৰোৱা নাই বিহু কমিটিসমূহো ৷
দেওবাৰে চানমাৰি খেলপথাৰত পৰম্পৰাগত ৰীতি নীতিৰ মাজৰে ৬১ সংখ্যক পূৱ গুৱাহাটী বিহু সন্মিলনৰ লাইখুঁটা স্থাপন কৰা হয় (Laikhuta of East Guwahati Bihu Summit has been established) । লাইখুঁটা স্থাপন কৰে বিহু সন্মিলনৰ উপদেষ্টা মৃদুল বেজবৰাই । ১৪ ৰ পৰা ১৭ এপ্ৰিললৈ চাৰিদিনীয়া বৰ্ণাঢ্য কাৰ্যসূচীৰ মাজেৰে চানমাৰি অসম অভিযান্ত্ৰিক প্ৰতিষ্ঠানৰ খেলপথাৰত অনুষ্ঠিত হ’ব বিহু সন্মিলন ।
এইবেলিৰ বিহু সন্মিলনৰ বাবে ধাৰ্য কৰা হৈছে প্ৰায় ৪০ লাখ টকাৰ বাজেট ৷ সংবাদ মাধ্যমৰ আগত এই কথা সদৰী কৰে সন্মিলনৰ সাধাৰণ সম্পাদক সীমান্ত ঠাকুৰীয়াই । লগতে তেওঁ কয় যে, এই সন্মিলনত থলুৱা সংস্কৃতি আৰু নৱ-প্ৰজন্মক সুযোগ দিয়া হ’ব । আনকি বিহু মঞ্চত জাতীয় সাজপাৰ পৰিধান কৰিহে শিল্পীসকলে অনুষ্ঠান পৰিৱেশন কৰিব পাৰিব ৷ লগতে তেওঁ এই বিহু মঞ্চত হিন্দী গীত পৰিৱেশন কৰিব নোৱাৰিব বুলিও মন্তব্য কৰে ।
উল্লেখ্য যে, পহিলা এপ্ৰিলৰ পৰা এই চানমাৰি অসম অভিযান্ত্ৰিক প্ৰতিষ্ঠানৰ খেলপথাৰৰ বাকৰিত শুভাৰম্ভ কৰা হ’ব বিহু কৰ্মশালা ৷ পূৱ গুৱাহাটী বিহু সন্মিলনিৰ বিহু মঞ্চত ১৪ এপ্ৰিলত শ্ৰেষ্ঠ বিহু হুঁচৰি দল, শ্ৰেষ্ঠ বিহু নাচনী আৰু অসম বিহুৱা প্ৰতিযোগিতা অনুষ্ঠিত কৰা হ’ব । লগতে ১৫ এপ্ৰিলত খেল-ধেমালি আৰু চিত্ৰাংকন প্ৰতিযোগীতা, মহিলাৰ প্ৰতিযোগীতা, অসম বিহুৱতী, শ্ৰেষ্ঠ ঢুলীয়া আৰু শ্ৰেষ্ঠ পেঁপা বাদন প্ৰতিযোগিতা অনুষ্ঠিত হ’ব । জানিব পৰা মতে, ১৬ আৰু ১৭ এপ্ৰিলত সাংস্কৃতিক অনুষ্ঠানো অনুষ্ঠিত কৰা হ’ব ।
লগতে পঢ়ক : Bihu Workshop in various places : বিহুলৈ বুলি কঁকালত টঙালি বান্ধি সাজু প্ৰতিগৰাকী অসমীয়া
