নিউজ ডেস্ক, 23 অক্টোবৰ: সোমবাৰে পুৱাতেই সকলো গুণমুগ্ধক কন্দুৱাই ইহ সংসাৰৰ পৰা মেলানি মাগিলে প্ৰখ্যাত শিক্ষাবিদ, সংগীতজ্ঞ ড৹ বীৰেন্দ্ৰনাথ দত্তই ৷ তেখেতৰ মধুৰ কণ্ঠৰে নিগৰি অহা ‘‘বগলী বগা ফোঁট দি যা’’, ‘‘বহুদিন বকুলৰ গোন্ধ পোৱা নাই’’, ‘‘ৰহিমলা ওৰণিৰ মাজেৰে’’, ‘‘অ’ ধুন ধুনীয়া মোৰ অকণমানি’’ আদি চিৰসেউজ গীতসমূহ আজিৰ দৰে অনাগত প্ৰজন্মৰ মাজতো যে জনপ্ৰিয় হৈ থাকিব তাত কোনো দ্বিধাগ্ৰস্ততা নাই ৷
ড৹ বীৰেন্দ্ৰনাথ সমাজৰ ভিন্ন ভাৰতৰ লোক-সংস্কৃতি অধ্যয়নৰ অন্যতম পুৰোধা আছিল । তেওঁৰ বিয়োগ কেৱল শৈক্ষিক সমাজৰ বাবেই নহয়, অসমীয়া লোক-সংস্কৃতি তথা সাংস্কৃতিক সমাজখনৰ বাবেও এক অপূৰণীয় ক্ষতি ।
এগৰাকী শিক্ষাবিদ, সংগীতজ্ঞ, গীতিকাৰ হিচাপে অধ্যাপক দত্তৰ বহুমুখী অৱদানে অসমৰ সাংস্কৃতিক পৰিৱেশত অম্লান জেউতি বিলাই গৈছে । গুৱাহাটী বিশ্ববিদ্যালয়ৰ লোক-সংস্কৃতি অধ্যয়ন বিভাগত তেওঁ নিজৰ জ্ঞান-গৰিমা আৰু সমৰ্পিত মনোভাৱেৰে আগবঢ়াই থৈ যোৱা অৱদান উত্তৰ-পূৰ্বাঞ্চলৰ চহকী ঐতিহ্যৰ সংৰক্ষণ আৰু প্ৰসাৰৰ ক্ষেত্ৰত অমূল্য হৈ ৰ’ব ।
অধ্যাপক দত্তৰ সৰলতা আৰু মৰমীয়াল স্বভাৱে অগণন ছাত্ৰ-ছাত্ৰী আৰু শিক্ষকক অনুপ্ৰাণিত কৰিছে । ব্যক্তিগত আৰু পেছাদাৰী দুয়োটা জীৱনতে তেওঁৰ অটল অনুশাসনে তেওঁৰ সৈতে চিনাকী হোৱাৰ সৌভাগ্য লাভ কৰা সকলোৰে বাবে প্ৰেৰণা হিচাপে কাম কৰে । অসম সাহিত্য সভাৰ প্ৰাক্তন সভাপতি হিচাপে তেওঁৰ কাৰ্যকালে সাহিত্য আৰু সংস্কৃতিৰ প্ৰসাৰৰ প্ৰতি দায়বদ্ধতাক আৰু অধিক আলোকপাত কৰে ।
গুৱাহাটী বিশ্ববিদ্যালয়ে তেওঁৰ মৃত্যুত গভীৰ শোক প্ৰকাশ কৰাৰ লগতে তেওঁৰ পৰিয়ালৰ সদস্যসকলক এই শোকবিহ্বল মূহুৰ্তত শক্তি প্ৰদান কৰিবলৈ নেদেখাজনক প্ৰাৰ্থনা জনাইছে । গুৱাহাটী বিশ্ববিদ্যালয়ৰ উপাচাৰ্য অধ্যাপক ড৹ প্ৰতাপজ্যোতি সন্দিকৈয়ে উল্লেখ কৰে যে অসমে প্ৰকৃত সম্পদ হেৰুৱাইছে । তেওঁ আৰু কয় যে ড৹ বীৰেন্দ্ৰনাথ দত্তৰ অৱদান অসমীয়াৰ মাজত চিৰকাললৈ জ্যোতিষ্মান হৈ থাকিব ৷
লগতে পঢ়ক: Singer Birendra Nath Datta : চিৰবিদায় মাগিলে লোক-সংস্কৃতিৰ গৱেষক, বিশিষ্ট শিল্পী বীৰেন্দ্ৰনাথ দত্তই
