গুৱাহাটী, 29 মাৰ্চ: অৱশেষত সকলো জল্পনা কল্পনাৰ ওৰ পেলাই কংগ্ৰেছ দলে অসমৰ সবাতোকৈ সন্মানীয় গুৱাহাটী লোকসভা সমষ্টিৰ বাবে কংগ্ৰেছ দলৰ নেত্ৰী ববিতা শৰ্মাৰ নাম ঘোষণা কৰাৰ পাছতে শুকুৰবাৰে তেওঁ ৰাজীৱ ভৱনত উপস্থিত হয় ৷ ৰাজীৱ ভৱনত কংগ্ৰেছৰ দলীয় কৰ্মীসকলে ববিতা শৰ্মা জিন্দাবাদ ধ্বনিৰে উষ্ম আদৰণি জনাই কংগ্ৰেছ প্ৰাৰ্থীগৰাকীক ৷ অসম প্ৰদেশ কংগ্ৰেছ কমিটিৰ মহিলা সদস্যসকলেও ববিতা শৰ্মাক মিঠাই খুৱাই আদৰণি জনায় ৷ গুৱাহাটী সমষ্টিক পুনৰ কংগ্ৰেছৰ দখললৈ আনিবলৈ পূৰ্ণ চেষ্টা চলাব বুলি ববিতা শৰ্মাই সাংবাদিকৰ আগত মন্তব্য কৰে । ববিতা শৰ্মা আৰু বিজেপিৰ কুইন ওজাৰ মাজত নিৰ্বাচনত তীব্ৰ প্ৰতিদ্বন্দিতা হ'ব বুলিও ববিতাই সাংবাদিকক জনায় ৷
উল্লেখ্য যে, গুৱাহাটী লোকসভা সমষ্টিৰ বাবে কংগ্ৰেছ দলে কাক টিকট প্ৰদান কৰিব এই প্ৰশ্নই ৰাজ্যৰ ৰাজনৈতিক মহলত বিশেষ প্ৰতিক্ৰিয়াৰ সৃষ্টি কৰি আহিছিল । কংগ্ৰেছ দলৰ দুজনকৈ পুৰুষ নেতা বলীন বৰদলৈ আৰু ৰমেন বৰঠাকুৰক পিছ পেলাই অৱশেষত ববিতা শৰ্মাই টিকট লাভ কৰিবলৈ সক্ষম হয় ।
