গুৱাহাটী, 22 ফেব্ৰুৱাৰীঃ নিবনুৱা সমস্যাই ৰাজ্যত ভয়াৱহ ৰূপ ধাৰণ কৰাৰ সময়তে পৰিবহন বিভাগৰ এটা কঠোৰ সিদ্ধান্তই চিন্তিত কৰি তুলিছে ৰাজ্যৰ 25 হাজাৰ যুৱকক ৷ কিয়নো পৰিবহন বিভাগে মহানগৰীত বন্ধ কৰাৰ সিদ্ধান্ত গ্ৰহণ কৰিছে ৰেপিড' বাইক সেৱা । যাত্ৰী অনা নিয়াৰ কৰাৰ ক্ষেত্ৰত পৰ্যাপ্ত নথি-পত্ৰ নথকাৰ বাবেই বিভাগীয় কৰ্তৃপক্ষই গ্ৰহণ কৰিছে এই সিদ্ধান্ত ৷ শনিবাৰে নথি-পত্ৰ নোহোৱাকৈ ৰেপিড' বাইক সেৱা চলাই থকাৰ অভিযোগত জোনালীস্থিত ৰেপিড বাইক সেৱাৰ মুখ্য কার্যালয় বন্ধ কৰি দিয়ে প্ৰশাসনে ৷
উল্লেখ্য যে, এই ৰেপিড' সেৱাৰ লগত জড়িত হৈ ৰাজ্যৰ প্ৰায় 25 হাজাৰ নিবনুৱা যুৱকে কৰ্মসংস্থাপনৰ বাট মোকলোৱাৰ লগতে পৰিয়াল পোহপাল দি আহিছে ৷ সেয়ে প্ৰশাসনৰ এই সিদ্ধান্তত যুৱক সকলে বিকল্প কৰ্মসংস্থাপনৰ কোনো ধৰণৰ আশা নেদেখি এতিয়া মূৰে কপালে হাত দিব লগা হৈছে ৷ গুৰুত্বপূৰ্ণ যে, মহানগৰীৰ ৰেপিড বাইক সেৱা বন্ধ কৰাৰ বাবে ৰাজ্যৰ কেব সন্থাই চৰকাৰক এখন স্মাৰকপত্ৰও প্ৰেৰণ কৰিছিল । গতিকে এনে প্ৰেক্ষাপটত ৰেপিড' সেৱাৰ লগত জড়িত এই যুৱক সকলৰ বাবে চৰকাৰে বিকল্প কৰ্মসংস্থাপনৰ ব্যৱস্থা কৰিব নে নকৰে সেয়া নিশ্চিতভাৱে লক্ষণীয় হ'ব ৷
লগতে পঢ়ক, পুনৰ মুকলি হ'ব নেকি ৰহাৰ টোল গেট ?
