যোৰহাট, 21 চেপ্তেম্বৰঃ ক্ৰমাৎ বিপদজ্জনক হৈ পৰিছে যোৰহাট । শেহতীয়াকৈ যোৰহাটত সংঘটিত হোৱা বিভিন্ন অপৰাধ মূলক কাৰ্যকলাপে উদ্বিগ্ন কৰি তুলিছে যোৰহাটবাসীক । শুকুৰবাৰে নিশা যোৰহাটৰ মালৌ আলিৰ এগৰাকী ৭০ উৰ্দ্ধৰ মহিলাক দুৰ্বৃত্তই ডিঙি ৰেপি হত্যাৰ প্ৰচেষ্টা চলোৱা ঘটনাই তীব্ৰ চাঞ্চল্যৰ সৃষ্টি কৰিছে ।
ঘটনাৰ বিৱৰণী অনুসৰি শুকুৰবাৰে নিশা অঞ্চলটোৰ বাৰণ বৰুৱা নামৰ অৱসৰপ্ৰাপ্ত শিক্ষয়ত্ৰী গৰাকীৰ ঘৰত এটা দুৰ্বৃত্তই মহিলা গৰাকীৰ ডিঙি ৰেপি হত্যা কৰাৰ চেষ্টা কৰাৰ লগতে লুটি লৈ যায় প্ৰায় ৩ হেজাৰ টকাৰ নগদ ধন আৰু মোবাইল ফোন । গুৰুতৰ ভাবে আহত মহিলা গৰাকীক ততাতৈয়াকৈ স্থানীয় ৰাইজে যোৰহাট চিকিৎসা মহাবিদ্যালয়লৈ লৈ যায় । সাম্প্ৰতি বাৰণ বৰুৱা সংকট মুক্ত বুলি জানিব পৰা গৈছে। উল্লেখ্য যে অৱসৰপ্ৰাপ্ত শিক্ষয়ত্ৰী গৰাকী অকলশৰীয়াকৈ অঞ্চলটোত বাস কৰি আহিছিল । আনহাতে এই সমগ্ৰ ঘটনা ড্ৰাগছৰ বাবে সংঘটিত হৈছে বুলি যোৰহাট আৰক্ষীয়ে সন্দেহ কৰিছে। কিয়নো দুৰ্বৃত্তই মহিলা গৰাকীয়ে ডিঙিত পিন্ধা থকা সোণৰ চেইন লৈ যোৱা পৰিলক্ষিত নহ'ল । ইতিমধ্যে মহিলা গৰাকীয়ে সমগ্ৰ ঘটনাৰ সন্দৰ্ভত যোৰহাট আৰক্ষী চকীত এজাহাৰ দাখিল কৰিছে।