নগাঁও, 1 জুলাই : ৰাজ্যত অব্যাহত আছে আধাৰ কাৰ্ড (Aadhaar Card)ৰ নামত লুন্ঠন । এইবাৰ হোজাই (Hojai) জিলাৰ উদালিত আধাৰ কাৰ্ড (Aadhaar Card) বনোৱাৰ নামত ধন লোৱাৰ অভিযোগ উত্থাপন হৈছে । এই সন্দৰ্ভত ইতিমধ্যে বদিউদ জামান নামৰ এজন লোকে হোজাইৰ উদালি থানা (Udali Police Station)ত চাৰিজন লোকৰ বিৰুদ্ধে এজাহাৰ দাখিল কৰিছে । বদিউদ জামানৰ এজাহাৰ ভিত্তিত উদালি থানা (Udali Police Station)ৰ ভাৰপ্ৰাপ্ত আৰক্ষী বিষয়া (OC)ই ঘটনাৰ বিৰুদ্ধে তদন্ত অব্যাহত ৰাখিছে ৷
হোজাই জিলাৰ উদালি থানাৰ অন্তৰ্গত নতুন বজাৰ লংকাজান আধাৰ কেন্দ্ৰ (Aadhaar Center) ত আধাৰ কাৰ্ড (Aadhaar Card) বনোৱাৰ নামত 1000 টকা বিচৰাৰ অভিযোগ উত্থাপন কৰিছে বদিউদ জামান নামৰ লোকজনে । এই সন্দৰ্ভত মঙলবাৰে বদিউদ জামানে উদালি থানা (Udali Police Station)ত এখন এজাহাৰ দাখিল কৰে ৷ বদিউদ জামানৰ এজাহাৰৰ ভিত্তিত লংকাজান আধাৰ চেণ্টাৰ (Aadhaar Center) ৰ পৰিচালনা কৰা আব্দুল খালেক, গুলজাৰ হুছেইন, আব্দুল ৰূপ, আব্দুল ৰহমানে তেওঁৰ পৰা আধাৰ কাৰ্ড (Aadhaar Card) বনোৱাৰ নামত এই ধন দাবী কৰিছিল ।
আনহাতে উদালি থানা (Udali Police Station)ৰ ভাৰপ্ৰাপ্ত আৰক্ষী বিষয়া (OC)গৰাকীয়ে বদিউদ জামানৰ এজাহাৰৰ ভিত্তিত লংকাজান আধাৰ চেণ্টাৰ (Aadhaar Center)ৰ পৰিচালনা কৰা লোককেইজনৰ ওপৰত তদন্ত আৰম্ভ কৰাৰ কথা জানিবলৈ দিয়ে ৷ আৰক্ষীয়ে অভিযুক্ত কেইজনক সোনকালে আটক কৰি বিহিত ব্যৱস্থা গ্ৰহণ কৰা কথা ব্যক্ত কৰে ৷ এই অনুসৰি মঙলবাৰে নিশা উদালি আৰক্ষী (Udali Police)য়ে অভিযান চলাই আব্দুল খালেক আৰু গুলজাৰ হুচেইনক আটক কৰি জেৰা অব্যাহত ৰাখিছে ৷
লগতে পঢ়ক : কি কি সিদ্ধান্ত গ্ৰহণ কৰিলে ৰাজ্যিক কেবিনেটে ?
