গোলাঘাট, 4 নৱেম্বৰ : বন্যহস্তীৰ উপদ্ৰৱৰ পৰা পৰিত্ৰাণ বিচাৰি বৃহস্পতিবাৰে গোলাঘাটৰ জিলাৰ খুমটাইৰ স্থানীয় লোকে নেদেখাজনৰ ওচৰত পূজা অৰ্চনা কৰে । খুমটাইৰ চুঙিহোলাৰ ধনশিৰি নৈৰ পাৰত স্থানীয় লোকে ভোগ দি কৰে পূজা অৰ্চনা । এখন বিশেষ কলৰ ভূৰ সাজি বন্তি জ্বলাই বিভিন্ন নৈবেদ্য, প্ৰসাদ আদি আগবঢ়াই উটুৱাই দিয়ে ধনশিৰিৰ বুকুত ।
অঞ্চলটোৰ ডেকা-বুঢ়াৰ পৰা আই-মাতৃ সকলোৱে অংশ লৈ বন্যহস্তী নাহিবৰ বাবে কৰে প্ৰাৰ্থনা । উল্লেখযোগ্য যে, পৰম্পৰাগতভাৱে বিগত প্ৰায় ৩০-৩৫ বছৰৰ পৰা দি অহা হৈছে এই ভোগ । মাজতে ২ টা বছৰ এই ভোগ দিয়া বন্ধ হোৱাত বন্যহস্তীয়ে অঞ্চলটোত সন্ত্ৰাস চলোৱাৰ সন্দেহ কৰিছে স্থানীয় লোকে । যাৰবাবে বৃহস্পতিবাৰে পুৱা সম্পূৰ্ণ আধ্যাত্মিকতাৰে স্থানীয় লোকে ভোগ দি অঞ্চলটোলৈ বন্যহস্তী অহা বন্ধ হোৱাৰ আস্থা ব্যক্ত কৰে ৷
উল্লেখ্য যে, গোলাঘাট ঢেকিয়ালৰ মলষুগুৰি গাঁৱৰ মাজেৰে পাৰ হৈ যোৱা এটা হাতীৰ জাকৰ আক্ৰমণত মঙলবাৰে কৰুণ মৃত্যুক আকোৱালি লয় এজন বয়োজ্যেষ্ঠ লোকে ৷ পৰিতাপৰ বিষয় যে, বন বিভাগৰ লোকৰ সন্মুখতে লোকজনক অতি কৰুণভাৱে হাতীয়ে আক্ৰমণ কৰাৰ পাছতো এটা গুলিয়ো নুফুটালে বনবিভাগৰ লোকে । যাক লৈ বন বিভাগৰ ভূমিকাত ক্ষোভ প্ৰকাশ কৰিছে স্থানীয় লোকে ৷
লগতে পঢ়ক : গোলাঘাটত হাতী-মানুহৰ সংঘাত; নিহত 1
