গোলাঘাট,1আগষ্টঃ কাজিৰঙা ৰাষ্ট্ৰীয় উদ্যানত বান পৰিস্থিতি সুস্থিৰ হৈছে যদিও বৰ্তমানেও 40 শতাংশ অঞ্চল পানীৰ তলত ৷ বানপানীৰ ফলত ওখ স্থান আৰু কাৰ্বি পাহাৰ লৈ ঢাপলি মেলা বিভিন্ন বন্যপ্ৰাণী পুনৰ ৰাষ্ট্ৰীয় উদ্যান খনলৈ ঘূৰি আহিছে বুলি কাজিৰঙা বন বিভাগে জানিবলৈ দিছে । উল্লেখ্য যে কাজিৰঙা বন বিভাগে 31 জুলাই লৈকে দিয়া তথ্য অনুসৰি ব্ৰহ্মপুত্ৰৰ প্ৰলয়ংকাৰী বানৰ ফলত ওখ স্থানলৈ ঢপলিওৱাৰ ফলত মুঠ 17 টা বন্যপ্ৰাণীৰ 37 নং ৰাষ্ট্ৰীয় ঘাইপথত গাড়ীৰ খুন্দাত মৃত্যু হৈছে । ইয়াৰ উপৰিও পানীত ডুবি 127 টা পহু, গড় 19 টা, হাতী 1 টা, বনৰীয়া মহ 4 টা, বন গাহৰি 20 টাকে ধৰি মুঠ 178 টা বন্যপ্ৰাণীৰ মৃত্যু হৈছে ।
আনহাতে বানত উটি অহা নতুবা ওখ স্থান বিচাৰি ঢপলিওৱা 70 টা বন্যপ্ৰাণীক উদ্ধাৰ কৰিছিল বন বিভাগৰ লগতে স্থানীয় লোকে । চিকিৎসাধীন অৱস্থাত মৃত্যু হৈছিল 5 টা পহু আৰু চিকিৎসাধীন অৱস্থাত এটা হাতীকে ধৰি 57 টা বন্যপ্ৰাণীৰ । বৰ্তমান 4 টা গড় চিকিৎসাধীন অৱস্থাত আছে ।
