সৰুপথাৰ, 15 নৱেম্বৰ : গোলাঘাট জিলাৰ উৰিয়ামঘাটত ভয়ংকৰভাৱে বৃদ্ধি পাইছে ধূলি প্ৰদূষণ (Dust Pollution)। পথৰ ধূলিয়ে বিপৰ্যস্ত কৰিছে উৰিয়ামঘাটৰ লোকসকলৰ স্বাভাৱিক জন-জীৱন । ইফালে ধূলিৰ প্ৰকোপত অতিষ্ঠ হৈ উৰিয়ামঘাট চেম্বাৰ্চ অৱ কমাৰ্চে (Chambers Of Commerce) বিগত তিনিদিন ধৰি দোকান-পোহাৰ বন্ধ ৰাখি সাব্যস্ত কৰিছে প্ৰতিবাদ। লগতে এই প্ৰচণ্ড ধূলি প্ৰদূষণ নিয়ন্ত্ৰণৰ দাবীত সীমান্তবাসী ৰাইজে পথ অৱৰোধৰ কাৰ্যসূচী গ্ৰহণ কৰিছে ৷
উল্লেখ্য যে, উৰিয়ামঘাটৰ পৰা অসম-নাগালেণ্ড সীমান্তৱৰ্তী অঞ্চল সংযোগী পথৰ দূৰাৱস্থাৰ লগতে দৈনিক শিল কঢ়িওৱা শ শ ডাম্পাৰ চলাচল কৰাৰ ফলত ধূলিময় হৈ পৰিছে সমগ্ৰ উৰিয়ামঘাট অঞ্চল । ফলত উৰিয়ামঘাট বজাৰৰ মাজমজিয়াত অৱস্থিত ব্যৱসায়িক প্ৰতিস্থানসমূহ ধূলিৰে প্ৰায় পুতি পেলোৱাৰ উপক্ৰম হৈছে ৷ ইয়াৰোপৰি ধূলিৰ বাবে ব্যৱসায়ীসকল ব্যাপক লোকচানৰ সন্মুখীনো হ'ব লগা হৈছে ।
এই ধূলি প্ৰদূষণে পথচাৰীসকলৰ তথা সৰ্বসাধাৰণ ৰাইজৰ স্বাস্থ্য আৰু জীৱনৰ প্ৰতি ভাবুকিৰ সৃষ্টি কৰিছে । ইতিমধ্যে ধনশিৰি মহকুমা প্ৰশাসনক এই সন্দৰ্ভত বহুবাৰ অৱগত কৰা হৈছে যদিও বৰ্তমানলৈকে কোনোধৰণৰ ব্যৱস্থা গ্ৰহণ কৰা নাই ।
সেয়ে উৰিয়ামঘাট চেম্বাৰ্চ অৱ কমাৰ্চ আৰু উৰিয়ামঘাট সীমান্ত আঞ্চলিক ছাত্ৰ সন্থাই পথ অৱৰোধ আৰু ব্যৱসায় প্ৰতিষ্ঠান বন্ধ আদি প্ৰতিবাদী কাৰ্যসূচী গ্ৰহণ কৰি তীব্ৰ ক্ষোভ প্ৰকাশ কৰিছে । ইতিমধ্যে স্থানীয় বিধায়ক বিশ্বজিৎ ফুকন (Biswajit Phukan)ৰ নিৰ্দেশত ৰাইজক সাময়িকভাৱে সকাহ দিবৰ বাবে শনিবাৰে বিয়লি পথটোত টেংকাৰেৰে পানী চটিওৱাৰ ব্যৱস্থা কৰা হৈছে ।
লগতে পঢ়ক: দিছপুৰ বিপদত : বছৰি দুহেজাৰ কোটিকৈ হ্ৰাস পাইছে ৰাজহ
