মৰাণ, 23 ছেপ্টেম্বৰ : ডিব্ৰুগড়ৰ ঘোঁৰামৰাত এগৰাকী কিশোৰীক চল-চাতুৰি কৰি অসৎ কাৰ্য চৰিত্ৰাৰ্থ কৰাৰ অভিযোগ উত্থাপিত হৈছে এগৰাকী ৬৩ বছৰীয়া বৃদ্ধৰ বিৰুদ্ধে ৷ অভিযোগ অনুসৰি বৃদ্ধ জনৰ কামনাৰ বলি হৈ সম্প্ৰতি পাঁচমাহৰ অন্তঃসত্বা হৈ আছে কিশোৰী গৰাকী । এই ঘটনা পোহৰলৈ অহাৰ পিছতে সমগ্ৰ অঞ্চলটোত এতিয়া ব্যাপক প্ৰতিক্ৰিয়াৰ সৃষ্টি হৈছে ।
জানিব পৰা মতে হাবিচুক গাঁৱৰ অভিযুক্ত জনৈক কোঁৱৰ নামৰ লোকজনে নিজৰ ঘৰত কাম কৰোৱাৰ চলেৰে দীৰ্ঘদিন ধৰি যৌন নিৰ্যাতন চলাই আহিছিল কিশোৰী গৰাকীক । কেৱল ইমানেই নহয় অভিযুক্ত কোঁৱৰে কিশোৰী গৰাকীক এই যৌন নিৰ্যাতনৰ সংক্ৰান্তত কাকো নক'বলৈ ভাবুকি দি আহিছিল ৷ অৱশেষত কিশোৰী গৰাকী অন্তঃসত্বা হোৱাৰ পিছত এই কথা জানিবলৈ পালে পৰিয়ালৰ লোকে ৷
লগে লগে কিশোৰী গৰাকী বৃদ্ধৰ কামনা বলি হৈ পাঁচ মাহৰ অন্তঃসত্বা হোৱাৰ খবৰ বিয়পি পৰে অঞ্চলটোত ৷ এই সন্দৰ্ভত ঘোঁৰামৰা আৰক্ষীৰ কাষ চাপে কিশোৰী গৰাকীৰ পৰিয়ালৰ লোক । ঘটনা সন্দৰ্ভত ইতিমধ্যে এটা গোচৰ ৰুজু কৰি ঘোঁৰামৰা আৰক্ষীয়ে অভিযুক্ত কোঁৱৰক বৃহস্পতিবাৰে গ্ৰেপ্তাৰ কৰি ৰঙাঘৰলৈ প্ৰেৰণ কৰিছে । সম্প্ৰতি, এই ঘটনা সন্দৰ্ভত ৰাইজৰ লগতে দল সংগঠনেও উদ্বিগ্নতা প্ৰকাশ কৰিছে ৷
লগতে পঢ়ক : লেডী কাৰ্জনৰ পিছত সাহসী পদক্ষেপ গ্ৰহণ কৰিলে অসম চৰকাৰে
