ডিব্ৰুগড়, 7 মেঃ লক্ ডাউনৰ মাজতে নাহৰকটীয়াৰ চাচনীত সংঘটিত হ'ল এক অবিশ্বাস্য, অমানৱীয় ঘটনা ৷ নিজ আইতাকে হত্যা কৰি কুঁৱাত পেলাই দিলে নাতিনীয়েকক ৷ ঘটনা সন্দৰ্ভত পোৱা তথ্য অনুসৰি, বৃহস্পতিবাৰে পুৱা নাহৰকটীয়াৰ চাচনীৰ খাটপথাৰ গাঁৱৰ 50 বছৰীয়া বুলু শইকীয়া নামৰ মহিলাগৰাকীয়ে নিজৰ ডেৰ বছৰীয়া নাতিনীয়েকক হত্যা কৰি কুঁৱাত পেলাই দিয়ে ৷
সেই সময়ত স্বামী নয়ণ কুমাৰ শইকীয়া দোকানত ব্যস্ত থকাৰ বিপৰীতে একমাত্ৰ পুত্ৰ হিৰণ কুমাৰ শইকীয়া চুলি কটাবলৈ ওলাই গৈছিল ৷ আনহাতে বোৱাৰী অঞ্জুমণি শইকীয়া গা ধুই থকাৰ সুযোগ গ্ৰহণ কৰি আইতাকে হত্যা কৰে শিশুটিক ৷ জঘণ্য ঘটনাটো সংঘটিত কৰি বুলু শইকীয়াই নাহৰকটীয়া আৰক্ষী থানাৰ অন্তৰ্গত মেৰবিল আৰক্ষী চকীত আত্মসমৰ্পণ কৰে।
এই ঘটনা সন্দৰ্ভত মহিলাগৰাকীৰ স্বামী নয়ণ কুমাৰ শইকীয়াই নাহৰকটীয়াত থানাত এক গোচৰ ৰুজু কৰে ৷ ফলস্বৰূপে আৰক্ষীয়ে ভাৰতীয় দণ্ডবিধিৰ ৩০২ ধাৰাৰ অধীনত আৰু ৯০/২০২০ নম্বৰৰ গোচৰত হত্যাকাৰী বুলু শইকীয়াক গ্ৰেপ্তাৰ কৰি জেললৈ প্ৰেৰণ কৰে।
